"Joseph Schulte" gəmisi Rusiya Federasiyasının "taxıl müqaviləsindən" nümayişkaranə şəkildə çıxmasından sonra Böyük Odessa limanlarını ilk tərk edən gəmi olaraq İstanbula çatıb.

Valyuta.az xəbər verir ki, bu barədə "Reuters" hadisə şahidlərinə istinadən yazıb.

Qeyd olunur ki, Rusiyanın “taxıl müqaviləsi”ndən çıxmasından sonra Ukraynanın açdığı müvəqqəti marşrutdan istifadə edən ilk gəmi Bosfor boğazından keçib.

Nəşr xatırladır ki, Rusiya tərəfindən bloklanan Odessa dəniz limanını tərk edən “Joseph Schulte” (Honq-Konq bayrağı ilə üzür. – red.) konteyner gəmisi 2022-ci il fevralın 23-dən bu limanda idi və Rusiya Federasiyasının hərbi təcavüzü səbəbindən oradan çıxa bilmirdi. 
Bildirilir ki, konteyner gəmisi İstanbulun cənubundakı Ambarlı limanında lövbər salacaq.

Ekspert Andriy Klimenkonun sözlərinə görə, gəmi yeni dəhlizlə üzüb və marşrutun qısa hissələrində cəmi iki dəfə Ukrayna ərazi dənizindən kənara çıxıb.

O hesab edir ki, bu, Ukrayna limanlarından “taxıl dəhlizi”nin Rusiyasız da mümkün olduğunu sübut edib. 

Onun fikrincə, quru yük gəmisinin gəmi sahibini bu səfərə icazə verməyə inandırmaq çox çətin olub. O, həmçinin ehtimal edir ki, konteyner gəmisindəki ekipaj çox güman, ukraynalılar olub, çünki dünyada heç bir dənizçi belə riskə gedə bilməzdi, xüsusən də bir gün əvvəl düşmənin Dunay limanlarına gecə hücumundan sonra.

Nicat