Rusiya Federasiyasında dollar və avro uçot dərəcəsinin fövqəladə artımından dərhal sonra yenidən yüksəlməyə başlayıb. Avqustun 15-də Mərkəzi Bankın məzənnəsinin fövqəladə artırılması rublun möhkəmlənməsinə səbəb olmayıb, Moskva birjasında dollar və avro yenidən artıma başlayıb.

Valyuta.az xəbər verir ki, bu barədə “Bloomberg” yazır. Bunu Moskva birjası məlumatları da təsdiq edir.

"Rusiyada uçot dərəcəsinin artırılması çöküşdən sonra rublu qaldıra bilmədi", - “Bloomberg” yazıb.

RBC Bluebay Asset Management-in inkişaf etməkdə olan bazarlar üzrə baş strateqi Timoti Eş “Bloomberg”ə bildirib ki, "Daha yüksək dərəcələr heç nəyi həll etməyəcək. Onlar yalnız ÜDM-in yavaş artımı bahasına devalvasiya tempini müvəqqəti olaraq ləngidə bilər". 

Eş qeyd edir ki, əsas problem müharibə və sanksiyalardır və burada Mərkəzi Bankın səlahiyyəti yoxdur.

“Bloomberg”in sorğusuna qatılan ekspertlər də məzənnə şokunun əsas təsirinin hələ gözlənilmədiyini vurğulayırlar. Devalvasiya iqtisadiyyata inflyasiyanın sürətlənməsini vəd edir ki, bunu ruslar hələ də öz ciblərində hiss edə bilmirlər, üstəlik, bu, Kreml üçün ən uğursuz anda - 2024-cü ildə keçiriləcək prezident seçkiləri öncəsi baş verəcək. 

“Bloomberg Economics”in rusiyalı iqtisadçısı Aleksandr İsakov xəbərdarlıq edir: "İstehlakçı qiymətlərinə keçid məzənnə şokundan təxminən altı ay sonra zirvəyə çatacaq. Və istehlakçı inamı 2024-cü ilin martında keçiriləcək prezident seçkiləri ərəfəsində ən aşağı nöqtədə olacaq". 

Bu arada, Moskva Birjasının məlumatları göstərir ki, Mərkəzi Bankın planlaşdırılmamış iclasından sonra əsas faiz dərəcəsi illik 8,5%-dən 12%-ə qaldırılıb. Səhər saatlarında 95,11 rubla qədər ucuzlaşan dolların məzənnəsi Moskva vaxtı ilə 13,23-də 98,17 rubla yüksəlib. Avro 107,36 rubla kimi bahalaşıb, baxmayaraq ki, ticarətin ilk saatlarında 104 rubldan aşağı düşüb.

Xatırladaq ki, Rusiya Bankının Direktorlar Şurası avqustun 15-də fövqəladə iclasında əsas uçot dərəcəsini 3,5 faiz bəndi - illik 8,5 faizdən 12 faizə qaldırmaq barədə qərar qəbul edib.

Avqustun 14-də rublun rəsmi məzənnəsi 1 dollar üçün 100 rublu ötüb.

Rusiya valyutasının zəifləmə tendensiyası 14 aydır ki, davam edir. Bundan əvvəl rublun düşməsi kəskin olsa da, qısamüddətli idi.

Rusiya prezidentinin köməkçisi Maksim Oreşkin bildirib ki, rublun zəifləməsinin və inflyasiyanın sürətlənməsinin əsas mənbəyi sərbəst pul-kredit siyasətidir.

Nicat