“Sinovac Biotech” şirkəti Azərbaycanın COVID-19 virusu əleyhinə peyvəndlə təminatını davam etdirəcək.

Valyuta.az AZƏRTAC-a istinadən xəbər verir ki, Çinin peyvənd istehsalı üzrə ixtisaslaşmış "Sinovac Biotech" şirkətinin baş meneceri xanım Quan Yan  müsahibəsində Azərbaycan ilə əməkdaşlıqdan danışıb.

“Sevindirici haldır ki, bizim şirkətin Azərbaycanla sıx əməkdaşlığı var və biz Azərbaycanı peyvəndlə təmin etməyə davam edirik. Biz tərəfdaşlıq etdiyimiz ölkələri, o cümlədən Azərbaycanı pandemiyaya qalib gəlmək üçün COVID-19 peyvəndi ilə təmin etmək işinə sadiqik”, - deyə baş menecer qeyd edib.

Quan Yan bildirib ki, Ümumdünya Səhiyyə Təşkilatının (ÜST) “Sinovac” şirkətinin “CoronaVac” peyvəndini təcili istifadə üçün təsdiqləməsi şirkətə daha çox ölkəyə vaksin təchiz etməyə, o cümlədən COVAX təşəbbüsü çərçivəsində müxtəlif dövlətləri peyvəndlə təmin etməyə imkan verəcək.

 ÜST-nin müvafiq qərarınadək “Sinovac”ın ikitərəfli razılaşma əsasında təxminən 40 ölkəni COVID-19-a qarşı peyvənd ilə təmin etdiyini bildirən baş menecer əlavə edib ki, indiyədək 50 ölkə “CoronaVac” peyvəndini təcili istifadə üçün təsdiqləyib.

Quan Yan “CoronaVac” peyvəndini milli vaksinasiya proqramında istifadə edən ölkələrdən əldə olunan məlumatların vaksinin perspektivli və ümidverici olduğunu göstərdiyini deyib: 

“Misal üçün deyə bilərəm ki, bu yaxınlarda Braziliyada balaca bir şəhərdə əhalinin böyük hissəsi COVID-19 virusuna qarşı məhz “Sinovac” şirkətinin vaksini ilə peyvənd olunub. Nəticədə ağır və çox ağır xəstələrin sayı kəskin şəkildə azalıb. Bu cür nəticələr bizim hamımıza ümid verir ki, vaksinasiya sayəsində pandemiyaya qalib gəlmək mümkündür. Bizim şirkət qlobal vaksin təchizatındakı rolunu davam etdirməkdə qərarlıdır. Şirkətimiz dünyada artan tələbatı nəzərə alaraq istehsal gücünü artırmaq istiqamətində yeni sərmayələr cəlb edib. Nəticədə 3-cü istehsal xətti istifadəyə verilib ki, bununla da illik istehsal gücü 2 milyard dozanı ötüb. İndiyədək biz 600 milyon doza peyvənd istehsal edərək yerli və xarici sifarişçilərə çatdırmışıq".

Qeyd edək ki, iyunun 1-də Ümumdünya Səhiyyə Təşkilatı Çinin “Sinovac Biotech” şirkətinin COVID-19 virusu əleyhinə “CoronaVac” peyvəndini təcili istifadə üçün təsdiqləyib. “Sinovac” şirkətinin COVID-19 əleyhinə peyvəndi təsirsiz hala gətirilmiş (inaktivləşmiş) vaksindir. Bu peyvəndlərin hazırlanmasında orqanizmdə ciddi xəstəliyə və ya əks-təsirə səbəb olmadan bədənin immunitet sistemini virusa məruz qoymaq üçün öldürülmüş virus hissəciklərindən istifadə olunub.

Azərbaycanda yanvarın 18-dən həyata keçirilən vaksinasiya prosesində Çinin “Sinovac” şirkətinin istehsal etdiyi “CoronaVac” peyvəndindən geniş istifadə olunur.