2025-ci ilin büdcə gəlirlərində gömrük rüsumlarından daxilolmalar 1 mlrd. 810 milyon manat proqnozlaşdırılır.

Valyuta.az xəbər verir ki, bu, “Azərbaycan Respublikasının 2025-ci il dövlət büdcəsi haqqında” qanun layihəsində əksini tapıb. Bu isə 2024-cü il üzrə gömrük rüsumları üzrə daxilolmalardan 3% və ya 53 mln. manat çoxdur. Cari il üçün gömrük rüsumları üzrə daxilolmalar 1 mlrd. 757 mln. manat müəyyən edilib.

2025-ci ilin dövlət büdcəsində fiziki şəxslərin gəlir vergisi üzrə proqnoz 179 mln. manat artırılaraq 1 mlrd. 989 mln. manata, hüquqi şəxslərin əmlak vergisi üzrə proqnoz 27,9 mln. manat artırılaraq 392,6 mln. manata, əlavə dəyər vergisi üzrə proqnoz 222,3 mln. manat artırılaraq 8 mlrd. 326,2 mln. manata, sadələşdirilmiş vergi üzrə proqnoz 32 mln. manat artırılaraq 405 mln. manata, yol vergisi üzrə proqnoz 15,4 mln. manat artırılaraq 142,8 mln. manata, aksizlər üzrə proqnoz 287,7 mln. manat artırılaraq 1 mlrd. 840,7 mln. manata çatdırılıb.

Ölkə ərazisinə idxal olunan yanacağa görə və xarici dövlətlərdə qeydiyyatda olan avtonəqliyyat vasitələri sahibləri tərəfindən ödənilən yol vergisi üzrə proqnoz dəyişməyərək 37 mln. manat, idxal aksizləri üzrə proqnoz isə yenidən185 mln. manat müəyyən edilib. Hüquqi şəxslərin mənfəət vergisi üzrə proqnoz isə 418,6 mln. manat azaldılaraq 6 mlrd. 344 mln. manata endirilib.

© APA