Bəzi brend məhsullar var ki, hesablayan zaman onların maya dəyərləri ilə satış qiyməti arasında çox ciddi fərq olur. Buna dünyaca məşhur brendlər misal ola bilər. Amma Azərbaycan bazarında da müəyyən məhsullar var ki, maya dəyəri ilə brendin qiyməti kəskin fərqlənir. Yəni, satılan məhsul maya dəyərindən dəfələrlə bahadır. 

Bəs bu sahibkarlar necə olur ki, həmin məhsulu dəfələrlə baha sata bilirlər? Bunun üçün necə marketinq strategiyası qurmaq lazımdır?

Valyuta.az-a danışan rəqəmsal marketinq və biznesin inkişafı üzrə menecer Rəqsanə Məmmədova deyir ki, brend məhsulların maya dəyəri ilə satış qiyməti arasında böyük fərqin olması hazırkı iqtisadiyyatın əsas reallıqlarından biridir:

“Bunun əsas səbəblərdən biri brendlərin illər ərzində qazandığı imic və statusdur. Brend bazara dəyərlər, status nümayişi və həyat tərzi kimi təqdim olunur. Məsələn, lüks geyimlər və saatlarının istehsalatçıları öz markalarını, prestij simvolu kimi təqdim edir. Yəni müştəri geyim və ya saat deyil, status nümayişini alır. Yəni brend müştəriləri üçün əlavə dəyər yaradıb. Belə markanın yaradılması üçün məhsulun unikallığını və onu rəqiblərdən fərqləndirən xüsusiyyətlərini təqdim etmək lazımdır. Bu çox çətin və uzun müddətli marketinq strategiyasıdır.

Hədəf auditoriyanı məhsulun fərqləndirici xüsusiyyətləri ilə tanış etmək və emosional təcrübə yaratmaq vacibdir. Amma məhsul markalaşanda, onu daha baha qiymətə satmaq olur. Bununla yanaşı, məhsulların məhdud sayda istehsalı və ya xüsusi kolleksiya formatında buraxılışı ilə eksklüzivliyi artırmaq mümkündür. Bu, məhsulun daha çox arzuolunan və dəyərli görünməsini təmin edəcək”.

Əvəz Həsənov