14 yaşında milyonçu olan gənc uğur qazanmasına kömək edən 4 vacib vərdişini paylaşıb.

Valyuta.az bu barədə xarici mediaya istinadən xəbər verir.

Bildirilib ki, Nyu-Yorkda yaşayan argentinalı sahibkar Lukas Roitman hələ 14 yaşında ikən hazırladığı əlavə reallıq proqramı “Airhand” ilə milyonçu olub. 28 yaşlı gənc ABŞ-ın nüfuzlu universitetlərindən biri olan Stanfordda kompüter elmləri üzrə təhsil aldıqdan sonra texnologiya və robototexnika sahəsində təhsilini davam etdirib. Keçən il “Adia Robotics” adlı süni intellektlə dəstəklənən dron şirkətini texnologiya nəhəngi “Apple”a 55 milyon dollara satan sahibkar uğurunda mühüm rol oynayan 4 vərdişini paylaşıb.

1 - Qətiyyətli olun

Roitman, Stanfordda işlədiyi illərdə çətinliklər qarşısında təslim olmamağın vacibliyini başa düşdüyünü qeyd edib. Universitetdə dünya səviyyəsində təhsil alarkən bir çox çətinliklərlə də üzləşdiyini bildirən milyonçu, “Məsələ təkcə çətin anlarda dözümlü qalmaq deyil, həm də belə dövrlərdə inkişaf edib fürsətlərdən istifadə edə bilməkdir" deyib.

2 - Həmişə maraqlarınız olsun

Roitman, hər gün yeni məlumatlar öyrənməyə açıq olmasının onu karyerasında irəli apardığını və texnologiya dünyasında uğurlu olmasına kömək etdiyini bildirib:
“Texnologiya kimi daim inkişaf edən bir sahədə davamlı olaraq yeni şeylər öyrənmək lazımdır. Buna uyğunlaşma motivasiyası da bu impulslardan irəli gəlir”.

3 - Yenilik vacibdir

Texnologiya dünyasında təklif ediləcək unikal bir şeyin olmasının vacibliyinə diqqət çəkən milyonçu bunun gənc investorlara fərqli şəxsiyyət yaratmasına imkan verə biləcəyini ifadə edib:

“Rəqabətli bazarda yalnız innovasiyanız önə çıxa bilər. Gənclərin məlumatlara və bir çox qaynaqlara bənzərsiz çıxışı var. Bunları sınamalı və yeni şeylər öyrənməlidirlər”.

4 - Balans tapın

Roitman, iş və şəxsi həyat balansının müvəffəqiyyət üçün əvəzolunmaz olduğunu ifadə edib. O bildirib ki, gərgin iş qrafikinə baxmayaraq, fortepianoda ifa etməyə, salsa dərslərinə qatılmağa və qayaya dırmanmağa vaxt ayırır.

“Ailəm və dostlarımla keyfiyyətli vaxt keçirmək mənə hərtərəfli həyat sürməyin vacibliyini xatırlatmaqla məni möhkəm saxlayır. Balansı əldə etmək üçün etdiklərinizi sevə-sevə edin” – deyə, gənc milyonçu əlavə edib. 

Əvəz Həsənov