Azərbaycan məhsullarının “Trendyol”da satışı gündəmə gəlib. Biznes cəhətdən yanaşsaq, müsbət haldır. Ancaq digər bir məsələ də var ki, “Trendyol”da daha çox satılan məhsullar qiyməti münasib olanlardır.  Türkiyəli müştərilər 20 manat civarında olan bir köynəyə “qiyməti bahadır”, “endirimdə olanda almışıq” və s. kimi şərhlər bildirirlər. Azərbaycanda isə istehsal xərcləri daha çoxdur, məhsulu istehsal etmək baha başa gəlir. Azərbaycanda istehsal olunan məhsullar “Trendyol”da satışa çıxarsa, bu məhsullar rəqabətə tab gətirə bilərmi?

Bu barədə Valyuta.az-a danışan iqtisadçı Eldəniz Əmirov bildirib ki, “Trendyol”da rəqabətə davamlı olmaq üçün minimum maya dəyəri ilə məhsullar istehsal edilməlidir: “Azərbaycanda istehsal olunan məhsulların birbaşa ixrac olunması və ya “Trendyol” vasitəsilə satışa çıxarılması hər hansı problem yaratmır. Problem məhsulu minimum maya dəyəri şərtləri ilə istehsal etməkdir. Bu, rəqabətə qalib gəlmək üçün mütləqdir. Azərbaycanda logistik xərclər digər ölkələrlə müqayisədə o qədər də aşağı deyil ki, biz birbaşa idxalda udaq, “Trendyol”da uduzaq. Yəni, bütün hallarda, istər birbaşa ixracda, istərsə də “Trendyol” üzərindən olan satışlarda məhsul baha olursa, bu, birbaşa maya dəyəri ilə əlaqədardır. Maya dəyərinin də baha olmasının başlıca səbəbilərindən biri istehsal olunan məhsulun elementlərinin idxaldan asılı olmasıdır”.

İqtisadçı Natiq Cəfərli də dünya bazarına çıxmaq üçün istehsalın artmasının lazım olduğunu qeyd edib: “Azərbaycanda istehsal olunan məhsulların beynəlxalq şəbəkədə satışa çıxarılması pozitiv xəbərdir, amma problem başqadır. Problem odur ki, biz nə satacağıq? Yəni, ilk növbədə Azərbaycanda istehsal olunan mallar artmalıdır ki, bunu dünya bazarına çıxaraq bilək. Azərbaycan xarici bazarlara 90 faizə yaxın enerji məhsulları çıxarır. Yəni bizim qeyri neft sahəsində istehsalımız çox aşağıdır. Biz çalışmalıyıq ki, istehsal sahələri artsın və məhsulu beynəlxalq bazarlara “Trendyol” platforması vasitəsilə çıxara bilək. Bunun üçün də çox böyük işlər görülməlidir”.

Əvəz Həsənov