“Rəhbərlər əməkdaşlarının işlərini sevərək, istəklə görmələrini gözləyirlər. Bu səbəbdən işdən  vaxtında çıxan işçiləri işinə həvəssiz və ya laqeyd olaraq qəbul edə bilirlər”.

Bunu İnsan Resursları üzə menecer Aytən Şıxaliyeva Valyuta.az-a dedi. 

Eləcə də bax: İş müsahibələrində maaş gözləntimizi deyəkmi?

Adətən, iş saatı 09:00-da başlayıb, 18:00-da bitir. İş yerlərinə görə bu saat dəyişə bilər. Ümumilikdə, əksər rəhbərlər iş saatı bitən kimi çıxan işçiləri sevmirlər. Mütəxəssis deyir ki, belə rəhbərlər iş saatından artıq işləyən işçilərin məsuliyyətli olduğunu düşünürlər: “Bu davranış və düşüncə tərzini bütün rəhbərlərə aid etmək doğru deyil. Daha çox rəhbərlərin özlərinin də iş saatlarından əlavə çalışdığı şirkətlərdə eyni yanaşmanı tətbiq etdiyi görülür. Həmin rəhbərlər iş saatlarından çox işləyən işçilərin şirkətə bağlılıqlarının daha çox olduğunu, daha məsuliyyətli və işlərini daha çox sevdiyini düşünürlər”.

Aytən xanımın sözlərinə görə, iş saatı bitən kimi işdən çıxan işçilər bəzi rəhbərlərdə laqeyd təəssüratı yaradır. Xüsusilə komandaya və ya işə yetərli töhfə vermədiyi hesab edilən işçilərin işin bitmə vaxtında işdən çıxması da bəzi hallarda rəhbərin xoşuna gəlmir: “Fədakarlıq edib öz istirahət vaxtını işə sərf edən işçiləri daha çalışqan, şirkətə qarşı sədaqətli və bağlılığı yüksək qiymətləndirən rəhbərlər vaxtında işdən çıxan işçilərə qarşı bunun tam tərsini düşünə bilər”.
Mütəxəssis, bu yanaşmanın doğru olmadığını deyir: “Lakin bu yanaşma doğru deyil. Vaxtın və işin düzgün planlanması, iş yükünün işçilər üzrə doğru bölünməsi, bir sözlə, sistemli idarəetmənin tətbiqi məhsuldar və məmnun iş mühiti formalaşdırır”.

Eləcə də bax: Hansı işçilər məzuniyyətə çıxmaq istəmirlər?

A.Şıxaliyeva bildirir ki, hər dəfə iş saatından artıq işləmək işçilərin məhsuldarlığının aşağı düşməsinə də səbəb ola bilər: “Davamlı olaraq günlük iş normasından əlavə çalışmaq işçilərin həyat və iş balansının pozulmasına səbəb olur. Bu, ailə münasibətlərinə, hobbi, istirahət və şəxsi inkişaf kimi sahələrinə də problemlər yarada bilər. İşçilərin sağlamlığına, iş məmnuniyyətinə, motivasiyasına neqativ təsir edir və bu da birbaşa məhsuldarlığı aşağı salır. Yorğun işçi daha çox səhv edir, zehni tükənmişlik yaradıcı düşüncəyə mane ola bilər. İş-həyat balansının və işçilərin sağlamlığının qorunması uzunmüddətli perspektivdə daha davamlı korporativ iş mədəniyyətinin yaradılmasının vacib hissəsidir”.

Nuray