ABŞ seçkilərindən əvvəl ili itki ilə başa vurmağa yaxın olan "Tesla", seçkilərdən sonra yaşadığı sürətli artımla ilin ən yaxşı performans göstərən səhmləri arasında yer aldı.

Valyuta.Az xəbər verir ki, ABŞ prezident seçkilərindən əvvəl "Tesla"nın səhmləri il ərzində 2,3% dəyər itirmişdi. Seçki günündən sonra isə səhmlər 73% artım göstərib və 2024-cü il üçün də artım faizi 69%-ə çatıb. İki aydan az bir müddət ərzində elektrik avtomobili istehsalçısı, şirkət haqqında əsaslı heç bir dəyişiklik baş verməməsinə baxmayaraq, bazar dəyərinə 572 milyard dollar əlavə edərək təxminən 1,4 trilyon dollarlıq bir şirkətə çevrildi.

Bu rallidə "Tesla"nın rəhbəri İlon Maskın (Elon Musk) yaxın dostu Donald Trampın (Donald Trump) yenidən prezident seçilməsi mühüm rol oynadı.

Avtomobillərə olan tələbin hələ də stabilləşmədiyi və gələcəyin daha da qeyri-müəyyən göründüyü şirkətdə bundan başqa ciddi bir dəyişiklik baş vermədi.

Sərmayədarlar "Tesla"nın rəhbəri İlon Maskın seçki kampaniyasında yeni seçilmiş prezident Donald Trampı fəal şəkildə dəstəkləməsini və onun rəhbərliyi dövründə qeyri-rəsmi bir rol üstlənməsini siyasi bir ustalıq olaraq qiymətləndirirlər.

"Interactive Brokers"in baş strateqi Stiv Sosnik (Steve Sosnick) bu barədə belə bir şərh edib: “Maskın yeni rəhbərliklə sıx əlaqədə olması faktına necə bir dəyər biçmək olar? Bu, demək olar ki, istənilən bir rəqəmlə ifadə edilə bilər.”

"Evercore ISI"nin analitiki Kris MakNellinim (Chris McNally) fikrincə, "Tesla"nın bazar dəyərinin 500-600 milyard dolları elektrik avtomobilləri və enerji biznesinə əsaslanır, qalan hissəsi isə sürücüsüz avtomobillər və humanoid robotlar kimi "gələcək layihələrə" aid edilir.

"DataTrek Research"ün qurucularından Nikolas Kolasın (Nicholas Colas) hesablamaları da göstərir ki, "Tesla"nın səhmlərinin qiymətinin 90%-dən çoxu şirkətin gələcəkdə nələr edə biləcəyinə bağlıdır.

Rəhim