Kaliforniya mərkəzli çip istehsalçısı “Nvidia"nın gəliri 28 iyulda sona çatan 3 aylıq dövrdə 30 milyard dollarla bazar gözləntilərini aşaraq rekord səviyyəyə çatıb.

Valyuta.az xəbər verir ki, “Nvidia” balansında 2025-ci maliyyə ilinin ikinci rübü olaraq qəbul etdiyi 28 iyulda sona çatan 3 aylıq dövr üçün maliyyə nəticələrini açıqlayıb. Buna görə şirkətin gəliri sözügedən dövrdə 122 % artaraq 30 milyard dollara çataraq rekord qırıb.

Gəlirini əvvəlki rübə görə 15 % artıran “Nvidia” keçən ilin eyni rübündə 13,5 milyard dollar gəlir əldə edib.

“Nvidia”nın xalis mənfəəti sözügedən rübdə illik 168 % artaraq 16,6 milyard dollara çatıb. Ötən ilin eyni dövründə şirkət 6,2 milyard dollar mənfəət əldə edib. Şirkətin 2024-cü maliyyə ilinin ikinci rübündə 25 sent olan səhm başına qazancı bu dövrdə 67 sentə yüksəlib.

Süni intellekt çiplərinə tələbat artmaqda davam etdikcə “Nvidia”nın səhmləri ilin əvvəlindən 150 %-dən çox dəyər qazanıb və şirkətin bazar dəyəri 3 trilyon dolları keçib.

Əvəz Həsənov