Azərbaycanda fəaliyyət göstərən 26 bank arasında 9 bankın natamam hesabatına görə bankların biznes kreditlərinin həcmini hesablamaq mümkün olmayıb. Bunlar “Azərbaycan Sənaye Bankı”, “Bank BTB”, “Xalq Bank”, “Bank Melli İran”, “Naxçıvan”, “Paskistan Milli Bankı”, “Pasha Bank” “Yelo Bank” və “Ziraat Bank”dır.

Valyuta.Az xəbər verir ki, 2020-ci ilin sonuna olan məlumatlara görə, ən çox biznes kreditlərini “Azərbaycan Beynəlxalq Bankı” verib. Dövlət bankının biznesmenlərə 1 milyard 323 milyon 360 min manatlıq kredit verməsi onu liderlik kürsüsünə əyləşdirə bilib. 582 milyon 77 min manatlıq biznes krediti ilə “Kapital Bank” ikinci, 539 milyon 499 min manatla isə “Premium Bank” üçüncü sırada qərarlaşıb.

Korporativ banklar arasında ən az biznes kreditini isə “Azər Türk Bank” verib. Dövlət bankının biznes kreditləri 2020-ci ilin sonunda 38 milyon 833 min manat təşkil edib. Onu 64 milyon 17 min manatla “Bank Avrasiya”, 96 milyon 280 min manatla isə “Yapı Kredi Bank” (Azərbaycan) izləyir.

Ən çox biznes kreditini verən retail bank isə 442 milyon 385 min manatla “Access Bank” olub. Siyahının ikinci sıranı 332 milyon 832 min manatla “Bank Respublika”, üçüncü sıranı isə 243 milyon 16 min manatlıq biznes krediti ilə “Rabitə Bank”  tuta bilib.

Ən az biznes kreditinə sahib retail bank isə “Express Bank” olub. O, daha çox istehlak kreditlərinə üstünlük verdiyi üçün bankın biznes kreditlərinin həcmi hər ötən il azalır.