Azərbaycanda 2-i dövlət bankı olmaqla, 26 bank fəaliyyət göstərir.

Mərkəzi Bankdan Valyuta.az-a daxil olan məlumata görə, xxarici kapitallı bankların sayı 12, o cümlədən xarici bankların yerli filiallarının sayı 2-dir. Bankların xidmət şəbəkəsi 447 filial, 2 715 ATM, habelə 18 708 işçi vasitəsilə təmin edilir.

2020-ci ildə bankların restrukturizasiyası prosesi “Azərbaycan Respublikasında maliyyə xidmətlərinin inkişafına dair Strateji Yol Xəritəsi”nə uyğun olaraq davam edib. Sektorun kapital adekvatlığı minimum requlyativ tələbi 2 dəfədən çox üstələyir.

Hesabat ilində kapital mövqeyi neqativ zonada olan və bərpa potensialı olmayan 4 bankın (“AtaBank” ASC, “AmrahBank” ASC, “AGBank” ASC və “NBCBank” ASC) lisenziyası Mərkəzi Bank tərəfindən geri çağırılıb və məhkəmənin qərarı ilə banklar müflis elan edilib. 

1 iyun 2020-ci il tarixindən etibarən bağlanmış bankların qorunan əmanətçilərinə agent bank olaraq seçilmiş “Kapital Bank” ASC və “Azərbaycan Beynəlxalq Bankı” ASC vasitəsilə Əmanətlərin Sığortalanması Fondu tərəfindən kompensasiyaların ödənməsi davam etdirilir. Fondun məlumatına görə ötən ilin dekabrın 31-nə 2020-ci ildə lisenziyası geri çağırılmış 4 bank üzrə ödənmiş kompensasiya məbləği 24.2 min əmanətçi üzrə 616.1 mln. manat təşkil edib.

Rövşən Ziya