“Bank Avrasiya” 2020-ci ilin sonunda olan hesabatını açıqlayıb.

Valyuta.Az bankın hesabatına istinadən xəbər verir ki, “Bank Avrasiya”nın cəmi aktivləri 2019-cu ilin yekunu ilə müqayisədə 10 milyon 738 min manat və ya 6.3% azalaraq 159 milyon 703 min manata düşüb. Bundan başqa bankın cəmi öhdəlikləri 12 milyon 168 min manat və ya 12% azalaraq 88 milyon 556 min manata enib.

Bankın cəmi kapitalı 2019-cu ilin sonu ilə müqayisədə 1 milyon 431 min manat artaraq 71 milyon 147 min manata çatıb.

DEPOZİT PORTFELİ AZALIB

“Bank Avrasiya”nın müştərilərinə verdiyi xalis kreditlərin həcmi 715 min manat artaraq 97 milyon 989 min manata yüksəlib. Buna baxmayaraq bankın depozit portfelində ciddi azalmalar olub. Belə ki, müştərilər bankda olan depozitlərinin 18.2%-ni geri çəkib. Nəticədə bankın depozit portfeli 1 il ərzində 9 milyon 793 min manat azalaraq 44 milyon 28 min manata düşüb.
Faiz gəliri 117 min manat azalaraq 10 milyon 957 min manata, faiz xərcləri isə 465 min manat azalaraq 1 milyon 945 min manata enən bankın xalis faiz gəlirir 342 min manat artaraq  9 milyon 11 min manata çatıb. Qeyri-faiz gəliri 295 min manat azalaraq 1 milyon 513 min manata, qeyri-faiz xərcləri isə 220 min manat azalaraq 4 milyon 977 min manata düşüb. Nəticədə bankın əməliyyat mənfəəti 3 milyon 724 min manat və ya 40.2% azalaraq  5 milyon 547 min manata enib.

Bankın xalis mənfəəti 1 il ərzində 4 milyon 130 min manat və ya 77.1% azalaraq 1 milyon 226 min manata bərabər olub.

“Bank Avrasiya” 2020-ci ili 70 milyon 225 min manatlıq məcmu kapitalla başa vurub.