“Xalq Bank”ın əksər göstəriciləri azalıb.

Valyuta.Az bankın hesabatına istinadən xəbər verir ki, bankın bir çox göstəriciləri 2019-cu ilin sonu ilə müqayisədə azalıb.

“Xalq Bank”ın müştərilərinə verdiyi xalis kreditlər 2019-cu ilin eyni dövrü ilə müqayisədə 345 mln. 332 min manat azalaraq 1 mlrd. 454 mln. manat olub. Bu azalma bankın cəmi aktivlərinin də azalmasına səbəb olub. Belə ki, “Xalq Bank”ın cəmi aktivləri 105 mln. 378 min manat azalaraq 2 mlrd. 353 mln. manata düşüb. 

Bankda yerləşdirilən depozitlərin 1 il ərzində 124 mln. 443 min manat azalaraq 1mlrd. 590 mln. manata enməsi “Xalq Bank”da cəmi öhdəliklərin 122 mln. 436 min manat azalaraq 1 mlrd. 916 mln. manata enməsinə səbəb olub. 

Bankın cəmi kapitalı cuzi artımla (17 mln. manat) 436 mln. 788 min manata bərabər olub.

XALİS MƏNFƏƏTİ AZALIB

“Xalq Bank”ın faiz gəlirləri  103 mln. 447 min manat, faiz xərcləri isə 19 mln. 676 min manat olub. Buna görə də bankın xalis faiz gəliri 5 mln. 363 min manat enərək 78 mln. 896 min manata düşüb. Qeyr-faiz gəlirləri 27 mln. 507 min manat, qeyri-faiz xərcləri isə 54 mln. 260 min manat olan bankın əməliyyat mənfəəti 52 mln. 143 min manat olub. 

Bankın xalis mənfəəti 1 il ərzində 7 mln. 672 min manat azalaraq 25 mln. 774 min manata düşüb.

2020-ci ilin sonunda “Xalq Bank”ın məcmu kapitalı 427 mln. 568 min manat olub.