Son üç ayda ən böyük dövlət bankı “Azərbaycan Beynəlxalq Bankı”nın (ABB) əmanət portfeli 258 milyon manat azalıb. 

Valyuta.az bu barədə bankın maliyyə hesabatına istinadən xəbər verir. 

Belə ki, 1 iyul 2024-cü il tarixinə ABB-nin ümumi depozit portfelinin həcmi ilin birinci rübü ilə müqayisədə 3% azalaraq 9 mlrd. 232 mln. manata enib. Halbuki, ilk rübdə bu rəqəm 9 mlrd. 490 mln. manat təşkil etmişdi. 

“Azərbaycan Beynəlxalq Bankı”ndakı fiziki şəxslərin əmanət portfeli 4,8% artaraq 2,18 mlrd. manata yüksəlib. 2024-cü ilin ilk rübündə bu rəqəm 2,08 mlrd. manat təşkil edib.

Bunun əksinə, şirkətlər üç ayda bankdan 358,6 milyon manat vəsaiti geri çəkiblər. İlk rüblə müqayisədə ikinci rübdə bankda hüquqi şəxslərin əmanətləri 7,41 mlrd manatdan 7,05 mlrd. manata enib. Başqa sözlə, 4,8% azalma olub. 

Xatırladaq ki, ABB 1992-ci ildə yaradılıb. Onun nizamnamə kapitalı 1 mlrd. 225,6 mln. manatdır. Bankın səhmlərinin 96,37%-i Azərbaycan hökumətinə, qalan hissəsi isə özəl investorlara məxsusdur.

Pünhan