İqtisadi terminlərin bir hissəsi bank və bank əməliyyatarına aiddir. Bu terminlərin bir çoxuna rast gəlsək də, onların tam açıqlamasını bilmirik. 

Valyuta.az bank sisteminə aid bəzi terminlərin açıqlamasını təqdim edir:

Annutiet (Kredit ödənişləri) - Kreditin ödəniş müddəti ərzində borcun aylar üzrə bərabər hissələrlə olan ödəniş növüdür.

Aktiv bank əməliyyatları – Kreditin təqdim edilməsi, qiymətli kağızların alınması və s. yəni sərbəst vəsaitlərin yerləşdirilməsi üzrə aparılan bank əməliyyatları.

Bankın Kredit Portfeli - Bankın bu və ya digər formada təqdim etdiyi bütün kredit vəsaitlərinin məcmusu.

Bank Transaksiyası - Vəsaitlərin bir hesabdan digərinə köçürülməsi.

Bank Bileti -  Mərkəzi banklar tərəfindən tədavülə buraxılan pul nişanı, əskinası.

Bonifikasiya - Mövcud kredit dərəcələrini tənzimləmək məqsədi ilə iqtisadiyyatın müəyyən sahələrinin və ya müəyyən qrup kreditə ehtiyacı olan subyektlərin məqsədli, əvəzsiz vəsaitlərin verilməsi.

Defolt - Borclar üzrə faiz və ya əsas məbləğin ödənilməsinə dair öhdəliyin yerinə yetirilə bilinməməsi.

Deponent -  Bankın depozitinə qiymətli əşya qoyan fiziki və ya hüquqi şəxs.

Dövlət bankı - Dövlətin mülkiyyətində olan və dövlət orqanları tərəfindən idarə olunan bank.

Depozit - Müəyyən məqsədlə saxlanmaq üçün bank və ya başqa kredit idarələrinə verilən pul və ya qiymətli kağız.

Faiz hesablanması - Faizlər yalnız kreditə götürülmüş (istifadə olunmuş) məbləğə hesablanır.

Onların hesablanması gündəlik əsasda həyata keçirilir. Əgər limitdən 5 günlük istifadə olunubsa, yalnız 5 gün üçün faiz hesablanacaq.

Card to Card - Kartdan karta icra olunan əməliyyatdır. Yəni, plastik kart vasitəsilə plastik kartı olan bir şəxsə vəsait göndərilməsidir.

Cari Hesab - Müştərinin adına açılır, pul vəsaitlərinin saxlanılması və nağdsız hesablaşmalar aparmaq üçün, pul köçürmələrinin alınması və göndərilməsi üçün istifadə edilir.

Fərdi - Biznesin ehtiyacından və ya mövsümündən asılı olaraq kredit ödənişlərində ayda bir dəfə faizlərin ödənilməsi şərti ilə fərdi yanaşma tətbiq edilir.

Konsaltinq əməliyyatları – bankın müxtəlif maliyyə məsələləri ilə bağlı müştərisinə göstərdiyi məsləhət (konsaltinq) xidmətləri.

Komissiya əməliyyatları – İqtisadi subyektlər arasında vasitəçilik xidmətləri, verilən tapşırıqların icrası və s. ilə bağlı bank əməliyyatları.    

Lisenziya - Ölkənin Mərkəzi Bankı tərəfindən kommersiya banklarına bank fəaliyyəti göstərməklə bağlı verilən rəsmi icazə, lisenziya. 

Revolver kredit xətti - 12 ayadək sərbəst ödəniş cədvəlli biznes kreditidir. Ödəniş edildikcə, təyin edilmiş kredit limiti bərpa olunur.

Overdraft - Qısa müddətli (2 aya qədər) sərbəst ödəniş cədvəlli biznes kreditidir.

Sərbəst ödəniş - Ayda bir dəfə faizlərin ödənilməsi şərti ilə, əsas məbləğin istənilən vaxt ödənilməsidir. Əsasən overdraftlara tətbiq olunur.

Davud