Azərbaycanda dövlət bankları tərəfindən verilən kreditlərin payının artması müşahidə edilir.

Valyuta.az xəbər verir ki, son bir ildə dövlət bankları tərəfindən ayrılan kreditlərin həcmi 52,5 faiz artaraq 6,45 milyard manata yüksəlib. On iki ay ərzində dövlət bankları kredit qoyuluşunu 2,22 milyard manat artırıb.

Banklar tərəfindən verilən ümumi kreditlərlə müqayisədən görünür ki, son bir ildə dövlət bankları özəl banklarla müqayisədə kreditlərin həcmini daha çox artırıb.

2023-cü ilin iyunun 1-nə olan məlumata əsasən, banklar 20,56 milyard manat kredit ayırmışdı. Bu qədər kreditin 16,33 milyard manatını özəl banklar, 4,23 milyard manatını dövlət bankları vermişdi.

2024-cü ilin iyunun 1-də bankların kredit qoyuluşu 25,2 milyard manata yüksəlib və bunun 18,71 milyard manatını özəl banklar, 6,45 milyard manatını dövlət bankları ayırıb.

Müqayisədən görünür ki, bankların kredit qoyuluşunda dövlət banklarının payı 20,57 faizdən 25,6 faizə yüksəlib. Bu artım onu deməyə əsas verir ki, dövlət bankları kredit qoyuluşunu daha böyük həcmdə artırıb.

Son bir ildə dövlət banklarının kredit qoyuluşunun daha sürətlə artmasının səbəblərindən biri özəl banklardan birinin bağlanmasıdır.

Hazırda Azərbaycanda 23 bank var və onların ikisi dövlət bankıdır. Bir il əvvəl isə bankların sayı 24 idi. Özəl banklardan birinin bağlanmasına baxmayaraq dövlət banklarının payının bu qədər sürətlə artması həm də onların kredit qoyuluşunun artırması ilə bağlıdır.

© Sfera.az