“Azərbaycan Beynəlxalq Bankı” (ABB) 2021 ci ilin 1-ci rübünə olan hesabatını açıqlayıb. Hesabata görə dövlət bankının məcmu kapitalında 43 milyon 734 min manatlıq geriləmə olub.

Valyuta.az bankın hesabatına istinadən xəbər verir ki, dövlət bankının maliyyə göstəricilərində məcmu kapitalından başqa xalis mənfəətində də azalma müşahidə olunub. Bu azalma isə bankın xalis faiz gəlirinin və əməliyyat mənfəətinin ötən ilin eyni dövrü ilə müqayisədə kiçilməsidir. Belə ki, 2020-ci ilin 1-ci rübü ilə müqayisədə bankın xalis faiz gəliri 1 milyon 438 min manat azalaraq 79 milyon 452 min manata, əməliyyat mənfəəti isə 11 milyon 722 min manat azalaraq 63 milyon 908 min manata düşüb. Bu da bankın xalis mənfəətinin 2020-ci ilin 1-ci rübü ilə müqayisədə 18 milyon 654 min manat və ya 36,5% azalaraq 32 milyon 395 min manata enməsinə səbəb olub. 

“Azərbaycan Beynəlxalq Bankı”nın xalis kreditlərinin 2020-ci ilin eyni dövrü ilə müqayisədə 208 milyon 15 min manat artması bankın cəmi aktivlərinin böyüməsinə səbəb olub. Belə ki, dövlət bankının aktivlər cəmi ötən ilin ilk rübü ilə müqayisədə 274 milyon 672 min manat və ya 3% artaraq 9 milyard 155 milyon 624 min manata çatıb.

ABB müştərilərindən topladığı depozitlərin həcmini 355 milyon 58 min manat və ya 6,6% artıraraq 5 milyard 703 milyon 151 min manata çatdırıb. Bu artımın əsas payı isə hüquqi şəxslər öhdəsinə düşüb. Onların bankdakı əmanətlərinin həcmi 1 il ərzində 308 milyon 578 min manat və ya 7,3% artaraq 4 milyard 508 milyon 755 min manata çatıb. Fiziki şəxslərin əmanətləri isə 46 milyon 481 min manat və ya 4% artaraq 1 milyard 194 milyon 396 min manata yüksəlib. Bu artımlar bankın öhdəliklər cəmini 310 milyon 151 min manat artıraraq 7 milyard 788 milyon 981 min manata bərabər olmasına səbəb olub.

Xalis kreditlərinin artmasında biznes kreditlərinin rolu böyük olub. Dövlət bankında istehlak kreditləri 73 milyon 824 min manat artaraq 626 milyon 651 min manata, biznes kreditləri 98 milyon 707 min manat artaraq 1 milyard 347 milyon 857 min manata, daşınmaz əmlak kreditləri isə 54 milyon 191 min manat artaraq 688 milyon 805 min manata çatıb.

Dövlət bankının bölüşdürülməmiş mənfəətinin 39 milyon 263 min manat və ya 76,7% azalması bankın kapitalının 35 milyon 478 min manat və ya 2,5% azalaraq 1 milyard 366 milyon 643 min manata enməsinə səbəb olub.

Bankın məcmu kapitalı 43 mlyon 734 min manat və ya 3,6% azalaraq 1 milyard 149 milyon 870 min manata enib.