Yaponiyanın avtomobil nəhəngləri "Honda" və "Nissan" qarşılıqlı biznes inteqrasiyası haqqında anlaşma memorandumu imzalayıblar. 

Valyuta.az xəbər verir ki, bu barədə avtomobil istehsalçılarının press-relizində deyilir.

"Yeni yaradılan müştərək holdinqin səhmlərinin Tokio Fond Birjasına çıxarılması planlaşdırılır. Listinq 2026-cı ilin avqust ayına planlaşdırılıb. Birgə holdinqin listinqi ilə həm "Nissan", həm də "Honda" müştərək holdinqin bütövlükdə törəmə müəssisələrinə çevriləcəklər", deyə məlumatda bildirilir.

"Honda" həmçinin öz səhmlərinin 1,1 trilyon yen (7 milyard dollar) hissəsini geri almaq niyyətində olduğunu açıqlayıb. Danışıqlar zamanı birləşdirilən şirkətin strukturu müzakirə olunacaq, bu məqsədlə inteqrasiya komitəsi yaradılıb. Avtomobil istehsalçıları tədqiqat və inkişaf, istehsal və satınalma sahələrində güclərini birləşdirməyi planlaşdırırlar.

Qeyd edək ki, martın əvvəlində elektrikləşdirmə kimi sahələrdə strateji tərəfdaşlıq haqqında müzakirələrə başlanıldığı bildirilmişdi. Bu gün avtomobil istehsalçıları xarici şirkətlərlə rəqabət aparırlar. Amerikanın "Tesla" və Çinin BYD şirkətləri elektrik avtomobilləri, avtonom idarəetmə və proqram təminatının hazırlanması sahəsində liderdir.

Sentyabr ayına qədər olan altı ayda "Nissan"ın xalis mənfəəti, qismən ABŞ-dakı ləng satışlarla əlaqədar olaraq, əvvəlki ilə nisbətən təxminən 94% azalıb. "Nissan "Mitsubishi Motors"un ən böyük səhmdarıdır.

"Honda" ilə birləşmə danışıqları "Mitsubishi"nin mümkün holdinq şirkətinə daxil edilməsi ilə bağlı müzakirələri əhatə edə bilər.

Noyabrda "Nissan Motor Co." dünya üzrə doqquz min iş yerini ixtisar etmək və satışların azalması səbəbindən qlobal istehsal gücünü 20% azaltmaq planını açıqlayıb.

Paşa Məmmədli