"Stellantis Auto Corporation" və "Factorial" "Dodge Charger Daytona" modelinə bərk hallı akkumulyatorları təqdim etmək üçün güclərini birləşdirib. Bu elektromobillərin 2026-cı ilə qədər yollara çıxması, innovativ texnologiyaların kütləvi istehsalına keçidin əsas mərhələsinə çevrilməsi gözlənilir. 

Valyuta.az xəbər verir ki, bu barədə “Stellantis”in mətbuat xidməti məlumat yayıb.

Yeni elektromobillər enerji tutumu 390 Wh/kq-dan çox olan "Factorial" bərk cisim batareyaları ilə təchiz ediləcək. Şirkət qeyd edir ki, bu akkumulyatorlar mövcud litium-ion həlləri ilə müqayisədə əhəmiyyətli üstünlüklərə malikdir: daha yüksək enerji sıxlığı, daha az çəki, təkmilləşdirilmiş performans və avtomobilin qiymətini daha da azaltmaq potensialı. "Stellantis" 2021-ci ildə "Factorial"a 75 milyon dollar sərmayə qoyub.

"Factorial"ın innovativ akkumulyator həllini STLA Large platformasına inteqrasiya etməklə biz onun elektrik avtomobillər sıramızı genişləndirmək potensialını təsdiqləyirik və müştərilərin gələcək illərdə təkmilləşdirilmiş performans, daha uzun diapazon və daha sürətli doldurma müddətlərindən faydalanmasını təmin edirik", deyə "Stellantis" şirkətinin texnoloqu və baş mühəndisi Ned Kuryk bildirib.

Qeyd edək ki, bərk vəziyyətdə olan batareyalar, ənənəvi litium-ion batareyalarda istifadə olunan maye və ya polimer gel elektrolitlərindən fərqli olaraq bərk elektrodlardan və elektrolitlərdən istifadə edən batareya növüdür. Onların istehsalçıları şarj müddətinin azaldılması, daha uzun diapazon və yanğın riskinin olmadığını vəd edir.

Paşa Məmmədli