"Volkswagen AG" bu il bir neçə zavodunu bağlamaq qərarına gələ bilər ki, bu da 15 mindən çox iş yerinin itirilməsinə səbəb olacaq. 

Valyuta.az xəbər verir ki, "Bloomberg" bu barədə "Jefferies" analitiklərinə istinadən yazıb.

Mütəxəssislərin fikrincə, avtomobil istehsalçısı müşahidə şurasının razılığı olmadan istehsal müəssisələrini bağlamağa qadirdir. Bunun üçün dördüncü rübdə 4 milyard avroya (4,4 milyard dollar) qədər ehtiyat ayrılması tələb oluna bilər.

Alman avtomobil nəhəngi yüksək xərclər, "Tesla" və BYD-nin başçılıq etdiyi Çin avtomobil istehsalçılarının artan rəqabəti ilə üzləşir. Bu ayın əvvəlində VW Almaniyada üç onillik iş zəmanətini dayandırıb.

"Biz uzunmüddətli perspektivdə şirkətin rəqabət qabiliyyətini qorumaq üçün qeyri-populyar tədbirlər görməyə məcburuq", deyə şirkət rəhbərlərindən biri bildirib.

"Jefferies"ə görə, "Volkswagen" 2-3 zavodu bağlamağı düşünür, beşə qədər Almaniya zavodu risk altındadır. Şirkət rəhbərləri analitiklərə bildiriblər ki, həmkarlar ittifaqları ilə danışıqlar uğursuz olarsa, onların heç bir ehtiyat planı yoxdur.

Ötən həftə "Bloomberg" xəbərdarlıq etdi ki, Aİ avtomobil sənayesində iş yerlərinin ixtisarı və mümkün zavodların bağlanması bütün Aİ iqtisadiyyatına mənfi təsir göstərə bilər. Ən böyük avtomobil istehsalçılarının zavodlarının təxminən üçdə biri tələbatın az olması səbəbindən 50%-dən az istehsal gücü ilə işləyir. Sənayenin Aİ ÜDM-nin 7%-ni və 13 milyon iş yeri təmin etdiyini nəzərə alsaq, onun gələcək böhranı bir çox əlaqəli müəssisələrə kaskadlı mənfi təsir göstərə bilər.

Paşa Məmmədli