İyul ayında Çində avtomobil satışları illik müqayisədə 3,1% azalaraq 1,7 milyona düşüb. Beləliklə, Çində avtomobil satışları dördüncü aydır ki, azalıb. 

Valyuta.az xəbər verir ki, bu barərdə Reuters Çin Sərnişin Avtomobilləri Assosiasiyasının (CPCA) məlumatlarına istinadən məlumat yayıb.

Ekspertlər hesab edirlər ki, bu, Çin iqtisadiyyatının kifayət qədər aktiv şəkildə bərpa olunmaması və istehlak tələbinin azalması ilə bağlıdır. Eyni zamanda, ötən ay Çindən avtomobil ixracı 20% artıb.

İyul ayında satılan avtomobillərin ümumi sayında elektrik mühərrikli avtomobillərin payı ilk dəfə olaraq daxili yanma mühərrikli avtomobillərin payını üstələyib. Satılan bütün avtomobillərin 50,7%-i tam elektrik və ya hibrid olub. Müqayisə üçün qeyd edək ki, üç il əvvəl bu rəqəm cəmi 7% idi. 

Son illərdə Çin hakimiyyəti elektrik avtomobillərinin istehsalını fəal şəkildə stimullaşdırır, əhəmiyyətli subsidiyalar ayırır və istehsala sərmayə qoyur. Ümumilikdə avtomobillərdən fərqli olaraq, elektrik avtomobillərinin satışı iyulda ötən ilin eyni dövrü ilə müqayisədə 37% artıb.

Paşa Məmmədli