Fransanın "Renault" şirkəti bu ilin ilk altı ayı üzrə satışlarını açıqlayıb. Bu dövr ərzində şirkət 1,154 milyondan çox avtomobil satıb ki, bu da 2023-cü ilin birinci yarısı ilə müqayisədə 1,9% çoxdur. 

Valyuta.az xəbər verir ki, bu nəticə ilk növbədə Avropada hibrid modellərə yüksək tələbat sayəsində əldə edilib.

"Renault Group"un ən böyük bazarı olan Avropada ümumi satışlar 6,7%, Avropanın ümumi avtomobil bazarı isə 5,5% artıb. Eyni zamanda, hibrid modellərin satışları 2023-cü ilin birinci yarısı ilə müqayisədə 59,6% artıb. 

"Renault Group"un ümumi satışlarında müxtəlif modifikasiyalı elektrik avtomobillərinin payı hazırda 29,6% təşkil edir ki, bu da bir il əvvəllə müqayisədə 4,3 faiz bəndi çoxdur.

Ən çox satılan brend "Renault" olaraq qalır, onun ümumi satışları 2%, Avropa bazarında isə 8,2% artıb. Üstəlik, indi satılan demək olar ki, hər ikinci Renault avtomobilində elektrik mühərriki var və bu markanın hibrid modellərinin satışı ötən illə müqayisədə 45% artıb. "Clio", "Austral" və "Captur" hibridləri Avropada ən populyar 10 model arasındadır.

Paşa Məmmədli