Amerikalı avtomobil istehsalçısı "Tesla" Çin şirkətləri ilə yüksək rəqabət səbəbindən daha əvvəl elan edilmiş yığcam, ucuz giriş səviyyəli elektrik avtomobili buraxmaq niyyətindən imtina edib.

Valyuta.az xəbər verir ki, bu barədə "Reuters" şirkətin planları ilə tanış olan üç mənbəyə istinadən yazıb.

Agentliyin mənbələrinə görə, "Tesla" kompakt avtomobil platformasında pilotsuz taksi hazırlamağa davam edəcək. "Reuters" iddia edir ki, bu qərar "Tesla"nın uzun müddətdir şirkətin qurucusu İlon Mask tərəfindən tez-tez bəyan edilən kütlələr üçün sərfəli elektrik avtomobili yaratmaq məqsədini dəyişdirir.

Gözlənilirdi ki, "Tesla"nın büdcəli elektrik avtomobili 25 min dollara olacaq. Hazırda ən sərfəli "Tesla" isə (Model 3) ABŞ-da 39 min dollara satılır.

Planların dəyişdirilməsi 10 min dollara kütləvi istehsal olunan elektrik avtomobilləri təklif edən Çin şirkətləri ilə şiddətli rəqabət fonunda baş verib.

Paşa Məmmədli