Rusiya avtomobil satıcıları "Renault"u məhkəməyə verdi

Rusiyanın ilk yerli diler holdinqləri olan RTDS və "BN-Motors" 2022-ci ildə Fransa şirkəti Rusiya bazarını tərk etdikdən sonra "Renault"a qarşı arbitraj məhkəmələrində iddia qaldırıb. 

Valyuta.az xəbər verir ki, bu barədə "Vedomosti" məlumat yayıb.

Qeyd edilir ki, iddiaların ümumi məbləği hələ nisbətən kiçikdir və 760 milyon rubl (təxminən 14,5 milyon AZN) təşkil edir.

"Renault" Rusiyadakı fəaliyyətini 2022-ci ilin martında dayandırıb. Mayın ikinci yarısında Sənaye və Ticarət Nazirliyi "Renault" qrupunun Rusiya aktivlərinin dövlət mülkiyyətinə keçdiyini açıqlayıb. "Renault Russia" zavodunun qiymətli kağızları Moskva şəhər rəhbərliyi tərəfindən alınıb, "Renault"un AvtoVAZ-dakı payı NAMI İnstitutuna (Sənaye və Ticarət Nazirliyinin tabeliyində) verilib. Sənaye və Ticarət Nazirliyinin rəhbəri Denis Manturov bildirib ki, avtomobil istehsalçısının aktivlərinin dövlətə təhvil verilməsi geri almaq hüququ ilə "rubl üçün sövdələşmə" kimi rəsmiləşdirilib.

"Renault"nun Rusiyada fəaliyyətini dayandırmasından xalis zərəri 2,3 milyard avro təşkil edib.

2023-cü ilin may ayında Rusiyadan olan avtomobil dilerləri Fransanın avtomobil istehsalat korporasiyasından Rusiya bazarını tərk etməsi ilə əlaqədar yaranan 8,5 milyard rubl məbləğində itkiləri kompensasiya etməyi xahiş ediblər. Rusiya Avtomobil Dilerləri Assosiasiyası (ROAD) bu barədə avtomobil istehsalçısının prezidenti Jan-Dominik Senara məktub göndərib.

Paşa Məmmədli