Avtomobil təlimçisi Adil Nəbiyev Valyuta.az üçün yazır

Səhhətində problem yaranmamış həkimə müraciət etməyən sürücülər avtomobilində də problem yaranmamış ustaya müraciət etmirlər. Təcrübədə adətən, bunu müşahidə edirəm. Vaxtında müayinələrdən keçsək, sağlamlığımızı diqqətdə saxlasaq, təbii ki sağlamlıq problemlərimiz də daha az olur. Avtomobil də elədir, diqqətdə saxlamalıyıq.
Qarşıdan qış mövsümü yaxınlaşır. Sürücülərin xərci də artır, çünki yayın istisində özünü biruzə verməyən nasazlıqlar soyuqlar düşən kimi hiss olunur. Nəinki qış şinləri, bərbad halda olan yay şinləri ilə də istifadə edən sürücülər az deyil. Soruşanda isə almağa pulları olmadığını söyləyirlər. Maliyyə tərəfindən başa düşürük, ancaq nəzərə alaq ki bu hallar çox vaxt faciəvi qəzalarla nəticələnir. Təhlükəsizlik üçün şinləri mövsümə uyğun dəyişək.

Yanacaq sistemini təmizlətdirək. Qarşıdan gələn qış mövsümünə hazırlıq üçün, benzin çənini dolu saxlamağa çalışmalıyıq. Şamları (sveçaları) və naqillərini yoxlayaq, lazım gəlsə, dəyişək. 

Şüşə silənlərin rezinlərini və mayesini dəyişmək lazımdır. Əyləc (tormoz) sistemini vaxtı-vaxtında mütləq yoxlamalıyıq.

Bir də peçləri yoxlasaq, yaxşı olar. Bəzi hallarda soyuq havalarda şüşələrin tərləməsi də ciddi problem yaradır. Həm işıqlandırma zəif olanda, həm də ki şüşələr tərlədikdə görüntü məhdudlaşır.

Avtomobilin əsas texniki hissələrini vaxtında dəyişmək lazımdır. 

Sonda onu demək istəyirəm ki, nasaz, istismara yararsız avtomillərdən istifadə ilə bağlı İnzibati Xətalar Məcəlləsində cərimə də nəzərdə tutulub. Yollarda soyuq havada qalmamaq, qəzalara səbəb olmamaq üçün sürücülərdən xahiş edirik ki, avtomillərimizi və canımızı sözün əsl mənasında saz vəziyyətdə saxlayaq.