İlk avtomobil seçimi həssas yanaşma tələb edir. Çünki ilk avtomobildə adam həvəsli olur, ona görə görünüş cəhətdən də ürəyincə olan avtomobil almaq istəyir. Eyni zamanda məsləhət görürlər ki, ilk avtomobil alan zaman yığcam, işlənmiş olanlarına üstünlük verməliyik. Bu fikirlər nə dərəcədə doğrudur? Ümumiyyətlə, ilk avtomobilimizi necə seçməliyik?

Büdcəmizə uyğundur?

Avtomobil təlimçisi Adil Nəbiyev Valyuta.az-a açıqlamasında bildirdi ki, ilk olaraq avtomobil seçimini edərkən büdcənizə diqqət etməlisiniz:

“Həm xaricdə, həm də Azərbaycanda belə bir strategiya var. Aldığınız avtomobilin qiyməti orta aylıq maaşın iki ilindən çox olmamalıdır. Yəni iki illik qazancımız, maaşımız nə qədərdirsə, avtomobilin qiyməti maksimum o qədər olmalıdır. Avtomobili rahatlığımız üçün alırıq. Ayağımızı yorğanımıza görə uzatmalıyıq ki, sonra borc-xərcə girməli olmayaq. Əsas avtomobilə sahib olmaq deyil. Onun xərclərini ödəyə biləcək qədər büdcəniz olmalıdır. Hər büdcəyə uyğun avtomobil var. Sizə uyğun olanı tapmaq üçün bazar araşdırması etməlisiniz”.

Ehtiyat hissəsi əlçatan olmalıdır

Avtomobil seçiminə gəldikdə isə mütəxəssis alman və yapon brendini tövsiyə edir. Çünki həmin brendlərin ehtiyat hissələrini tapmaq da asandır:
“Azərbaycanda ən çox istifadə olunan avtomobillər hansılardırsa onları məsləhət görürük. Çünki avtomobilin xərci təkcə almaqla bitmir. Avtomobilin hansısa ehtiyat hissəsi zədələndikdə onu düzəltdirmək və ya dəyişmək lazımdır. Avtomobil qulluq tələb edir. Ona görə də, elə avtomobil seçməlisiniz ki, həmin brendin ehtiyat hissələri əlçatan olsun”.

Böyük, yoxsa kiçik ölçülü avtomobil?

Böyük, yoxsa kiçik ölçülü avtomobillə başlamaq daha əlverişlidir? – sualının cavabına gəlincə, A.Nəbiyev bildirdi: “Bəzən düşünürlər ki, kiçik avtomobillə başlasalar, böyük avtomobil sürə bilməyəcəklər və ya əksinə, sonra kiçik avtomobil alsalar, ona öyrəşə bilməyəcəklər. Əslində isə, hansı avtomobili seçməyin fərqi yoxdur, əsas öyrənmək lazımdır. Avtomobili sürməyi tam öyrəndikdən sonra başqa avtomobili öyrənmək çox da vaxt aparmır. Məsələn, mən təlim üçün ən böyük maşından istifadə edirəm. Çünki böyüyünü sürən, balacanı daha yaxşı sürər. Normalda biz əvvəlcə öz maşınımızda öyrədirik, sonra tələbənin avtomobilinə keçirik”. 

Nuray