Prezident İlham Əliyev Vergi Məcəlləsində dəyişiklik edilməsi haqqında qanunu təsdiq edib.

Dəyişikliyə əsasən, ölkə ərazisində istehsal olunan minik avtomobillərinin satışı 2023-cü il mayın 1-dən 10 il müddətinə ƏDV-dən azad olunub.

Dəyişiklik ölkə ərazisində minik avtomobillərinin istehsalının dəstəklənməsini nəzərdə tutur.

Valyuta.az-a açıqlamasında İqtisadi və Sosial İnkişaf Mərkəzinin sədri Rəşad Həsənov bildirib ki, bu addım yerli avtomobillərin maya dəyərinin aşağı düşməsi və daha ucuz qiymətə bazara çıxarılmasına imkan verəcək:

“Amma təcrübə göstərir ki, bu kimi təşəbbüslər qısa müddətli dövrdə bazarda müəyyən effekt versə də, orta və uzunmüddətli dövrdə qiymət keyfiyyət aspektindən dəstəklənmədiyi halda, meyl daha çox istehsal tarixi 10 ildən çox olan və ikinci əl istifadə olunmuş avtomobillərin idxalına yönələcək. Dövlət bir tərəfdən fiskal güzəştlərlə prosesi dəstəkləyirsə, ikinci tərəfdən mütləq mənada istehsalçılar da keyfiyyət prizmasından yerli məhsulların rəqabətliliyini sübut etməyə çalışmalıdırlar. Əks halda yenə də hansısa məqsədlərlə dövlət qurumlarının bu avtomobilləri almasını görməklə kifayətlənəcəyik. Belə ardıcıllıqla sonrakı mərhələdə tələbin ardıcıllığının pozulması ilə müəssisənin mənfəətliliyinin azalması və nəticədə onun bağlanmasının şahidi olacağıq”. 

Ramiz