Ölkədə avtomobil bazarında balanslaşdırma siyasəti aparılır. Söhbət ekoloji təmiz– hibrid avtomobillərdən gedir. Mühərrik həcmi yüksək olan avtomobillərin aksiz vergisi, gömrük rüsumu yüksəldilib. Ekoloji təmiz avtomobillər isə əlavə dəyər vergisindən azad edilib.

Bu sözləri avtomobil bazarının hazırkı vəziyyətlə bağlı Modern.az-a danışan nəqliyyat eksperti Eldəniz Cəfərov söyləyib.

Ekspert bildirib ki, yanvar ayından ölkəyə idxal olunan ekoloji təmiz avtomobillərin qiymətində enmə müşahidə olunub:

"Nəticədə qismən də olsa bu avtomobillər vətəndaşlar üçün əlçatandır. Hazırda avtomobil bazarında qiymətlər stabildir. Mövsümü olaraq yayda qiymətlər həmişə stabil qalır. İyun ayında ötən aya nisbətən həm yeni, həm də köhnə avtomobillərin satışı 10-15 faiz artıb. Ötən ilin analoji dövrü ilə müqayisədə də satışlar 15-20 faiz artıb. Birinci əl avtomobil bazarında yanvar ayında sonra hibrid avtomobillərə maraq çoxdur. Əsasən krasover seqmentinə üstünlük verirlər. Bu krasoverlərin mühərrik həcmi təxminən 1500 kubsantimetrdən 2500 kubsantimetrə qədərdir. İkinci əl avtomobil bazarında isə vətəndaşlar daha çox sedan, heçbek modellərinə üstünlük verirlər. Bu modellərin mühərriki isə 1500 kubsantimetr həcmindədir".

E.Cəfərovun sözlərinə görə, "Aİ-95" markalı benzinin bahalaşması hibrid avtomobillərə tələbi daha da artıracaq:

"Aİ-95" və "Aİ-98" markalı benzinlərin qiymətinin yüksəlməsi hibrid avtomobillərə marağı və tələbi artırmışdı. Düşünürəm ki, bu maraq və tələb daha da artacaq. Çünki hibrid avtomobillər qismən benzinlə çalışır. Ekoloji təmiz avtomobillərə tələbin artması ilə yanaşı dizellə çalışan avtomobillərin də ölkəyə idxalı arta bilər. Benzinin baha olması səbəbindən vətəndaşlar qənaətcil yollara əl atacaqlar. Avropa ölkələrində dizel mühərriki ilə çalışan avtomobillərin istismarı artıq yasaq edilib. Ehtimal var ki, Avropada olan ikinci əl dizel mühərrikli avtomobillərin ölkəmizə axını başlasın".