"2020-ci ildə Rusiya Federasiyasının idxal etdiyi meyvənin həcmi 2 faiz artaraq  5.2 milyard dollar təşkil edib".

Valyuta.az xəbər verir ki, bu fikri iqtisadçı ekspert Qaşqay İsmayıl bildirib.

Ekspert qeyd edib ki, ilk 5 ixracatçı srasında Türkiyə, Ekvador, CAR, Misirlə yanaşı, Azərbaycan da var: 

“Düzdür, Azərbaycandan bəzi hallarda İran və Türkiyə məhsulları da idxal edilir və Rusiyada bundan xəbərdardılar, amma istənilən halda, tendensiya müsbətdir”.

Q,İsmayıl aqrar sahəyə baxan dövlət qurumlarına müraciət edərək maraqlı bir təklif irəli sürüb:

“Ölkənin kənd təsərrüfatına cavabdeh olan şəxslər, yaxşı olardı ki, böyük su resursları tələb edən pambıq, yaxud qaz sərfiyyatı baxımından baha başa gələn pomidor əvəzinə, ənənəvi olaraq Azərbaycan kəndlisinin üstün olduğu bağçılığı stimullaşdırsınlar. Ölkənin torpaq, su ehtiyatları, iqlim şəraiti, Rusiya, həmçinin Avropa bazarlarına çıxış imkanları bağçılıq üçün idealdır. Kür çayının quruduğu bir dövrdə, azalmaqda olan su ehtiyatlarını kəndliyə normal gəlir gətirməyən pambığa xərclmək əvəzinə, fermerlərə bağçılıq üçün kreditlərin ayrılması, ən mühümü isə, ixracın stimullaşdırılması, regionların həqiqətən də dirçəldilməsinə gətirib çıxara bilərdi”. 

Onun fikrincə, hazırda Azərbaycan kəndlisinin əsas ehtiyacı, heç də Olimpiya Komplekslərinə yaxud divarların bəzədilməsinə deyil, effektiv gəlir gətirən, paytaxta axının qarşısını ala bilən istehsalat sahələrinin yaradılmasındadır.

Ekspert vurğulayıb ki, neft gəlirlərinin ölkəni təmin edə bilməyəcəyi dövr yaxınlaşdıqca, alternativ mənbələrin tapılması həyati əhəmiyyət kəsb edir.