Son günlər ölkədə müşahidə olunan qeyri-sabit hava şəraiti və normadan artıq yağan yağışlar bir sıra problemlər yaradıb. Bu problemlər yol infrastrukturunda müəyyən məhdudiyyətlərə gətirib çıxarıb. Eləcə də küçələr, məhəllələr, obyektlər və fərdi yaşayış evləri subasmaya məruz qalıb. İnsanlar subasmaya məruz qalmış ərazilərdən xilasedicilərin köməkliyi ilə təxliyə olunub. Bununla yanaşı, son günlərin intensiv yağıntılarının kənd təsərrüfatına da mənfi təsirlər göstərdiyi istisna edilmir.

Bəs, görəsən normadan artıq yağıntıların kənd təsərrüfatı məhsullarının qiymətinə təsiri ola bilərmi?

Məsələ ilə bağlı açıqlama verən Kənd Təsərrüfatı Nazirliyinin Bitkiçiliyin təşkili və mönitorinq şöbəsinin müdir müavini Fərman Kərimov deyib ki, yağışların kənd təsərüfatı məhsullarının, xüsusilə meyvə tərəvəzin qiymətinə təsir göstərəcəyi gözlənilmir. 

Onun sözlərinə görə, normadan artıq yağan yağışlar meyvə və tərəvəzlərin keyfiyyətinin aşağı düşməsinə səbəb ola bilər: “Amma bu, qıtlıq yaradaraq qiymətlərin artmasına səbəb olmur. Çünki artıq bir çox meyvələrin yığımının sonudur və ona görə də qiymətlərə təsir göstərməsi gözlənilmir”.

Nazirlik rəsmisi söyləyib ki, əvvəldən bu cür yağışlar yağsaydı, müəyyən qədər xərclərə təsir edərdi və eyni zamanda bir sıra meyvələrin yetişməsinə mənfi təsir göstərərdi: “Ancaq meyvələr artıq formalaşıb, yığımlar sona çatır. Ona görə də hər hansı ciddi təsir göstərməyəcək. Ötən il də bu cür yağışlar oldu, ancaq qiymət artımı və ya qıtlığa səbəb olmadı. Bu il də bu cür fəsadlar gözlənilmir”.

© İqtisadiyyat.az