Mətbuatın yazdığına görə, Xankəndidə fəaliyyət göstərmək istəyən sahibkarlara bir sıra güzəştlər olacaq. Nəzərdə tutulan güzəştlər isə bunlardır: Vergi güzəştləri, sosial güzəştlər, kommunal güzəştlər, 10 il müddətinə vergidən azad olma və s. 

Xankəndilə bağlı sahibkarlar üçün tətbiq edilməsi gözlənilən güzəştlər başa düşüləndir. Ərazinin inkişafı baxımından belə bir addımın atılması vacib elementdir. 

Amma qeyd edək ki, uzun illərdir sahibkarların bölgələrə marağının artırılması vacibliyindən danışılsa da, bu günə qədər iş adamları regionlara investisiya yatırmaq, hansısa bir istehsalat müəssisəsi yaratmağa o qədər də maraq göstərməyiblər. Nəticədə ölkənin iqtisadi potensialının 90 faizindən çoxu Bakı şəhəri və Abşeron yarımadasında cəmləşib. 

Bu mənada Xankəndidə fəaliyyət göstərmək üçün sahibkarlara edilməsi gözlənilən güzəştlərin ölkənin bütün digər bölgələrinə də şamil edilməsi sərmayələrin regionlara doğru axmasına rəvac verə bilərmi?

Valyuta.az-a açıqlamasında İqtisadi və Sosial İnkişaf Mərkəzinin sədri Rəşad Həsənov bildirib ki, sahibkarların regionlara axını üçün güzəştlərin olması vacibdir:

“Bu biznesin tranzaksiya xərclərini azaldar və investisiya repatrasiyasına müsbət təsir göstərər. Amma bununla yanaşı, ilk növbədə Azərbaycanda biznesin dayanıqlığı ilə bağlı vacib mesajlar verilməlidir. Bu xüsusən də mülkiyyətin toxunulmazlığı, məhkəmə institutlarının fəaliyyəti ilə yüz faiz dəstəklənməlidir”. 

Həmsöhbətimiz deyib ki, mülkiyyətə təhlükələr və sərmayə təhlükələri aradan qalxdıqdan sonra, hətta müvafiq təkliflər olmadan belə regionlara investisiyalar axa bilər:

“Regionlar hökumət siyasətinin vacib parametri olmalıdır. Son 30 ildə bu ciddi şəkildə unudulub. Onun nəticəsidir ki, fəsadları da ortadadır. Nəzarət olunmayan daxili urbanizasiya, paytaxt ətrafında yaşayış şərtlərini dözülməz hala gətirib çıxarıb. Regionlar da boşalır”.    

Ramiz