Azərbaycanda bir sıra əkin torpaqları kiçik həcmlidir. Bu torpaqlar 1-2 hektar ərazini əhatə edir. Belə olan təqdirdə isə fermerlər kiçik həcmli torpaqları əkib-becərməkdə maraqlı olmurlar. Bəs 1 hektar ərazi fermer üçün nə qədər gəlir gətirə bilər?

Naxçıvanın sabiq kənd təsərrüfatı naziri, aqrar sahə üzrə ekspert Rəcəb Orucov Valyuta.az-a bildirib ki, Azərbaycanda hər bölgənin özünəməxsus əkin xüsusiyyətləri var: “Mərkəzi Aran bölgəsi üçün verilən əkin proqnozu, Şimal bölgəsi üçün uyğun deyil. Hər iqtisadi zonanın təbii iqlim şəraitinə uyğun olaraq əkinçilik sisteminin qurulması daha məqsədəuyğun olar”.

O deyib ki, Mərkəzi Aran bölgəsi ölkənin əsas məhsullar üzrə istehlakını təqribən 70-75%-ini təmin edir: “Bu bölgə üçün strateji məhsullar daha uyğundur. Mərkəzi Aran bölgəsi üçün ən rentabelli bitkilər şəkər çuğunduru, qarğıdalı, buğda, taxıldır”.

“1 hektardan buğda əkinində dəmyə əkinçiliyində 600 manat, suvarılan sahədə əkilən buğda üçün 1000 manat xərc lazımdır. 1 hektar qarğıdalı əkini üçün çəkilən xərc 1500-1600 manata yaxındır. Şəkər çuğundurunda bu rəqəm 2000-2300 manata yaxındır. Bu bitkilər rentabelli bitkilərdir. Çünki istehlak bazarının tələbini xaricdən idxal hesabına ödəyirik”, ekspert deyib.

R.Orucov hektardan əldə edilən gəlir məsələsinə toxunub: “Taxılda hər hektardan xərci çıxandan sonra 1000-1500 manata yaxın gəlir əldə etmək mümkündür. Qarğıdalıda 1500 manata yaxın xalis gəlir formalaşdırmaq mümkündür. Hektardan 60-70 ton şəkər çuğunduru əldə edilərsə, təqdirdə hər hektardan 2 min manata yaxın xalis gəlir əldə etmək olar”.

O qeyd edib ki, kənd təsərrüfatı təbii iqlim şəraitindən asılı olan sahədir: “Ona görə də hər il hər hektardan fərqli məhsuldarlıq əldə etmək mümkündür”.

Ekspert vurğulayıb ki, bu gün daxili bazarda keyfiyyətli məhsullarla yer tutmaq olar: “Ona görə də bazarın tələbinə uyğun məhsullar seçilməlidir. Məsələn, şəkər çuğunduru rentabelli məhsuldur. Azərbaycanın şəkər çuğunduruna olan tələbi illik 250 min tondan çoxdur. Ümumi istehsalımız bu istehlak tələbinin müəyyən hissəsini ödəyir. Ona görə də bu məhsula kifayət qədər ehtiyac var”.

Ekspert vurğulayıb ki, ölkənin şimal bölgəsi əsasən meyvə əkirlər: “Meyvələrin bəziləri çox illik əkmədir. Məhsuldarlıq bir qədər gec əldə edilir”.

“Fermerlər məhsulu əkməmişdən əvvəldən artıq satış bazarlarını formalaşdırmaları lazımdır. Fermerlərimiz müqavilələrlə işləməyi bacarmalıdırlar”, o əlavə edib.

Nara