Dünyada olduğu kimi, son illər Azərbaycanda da bir sıra sahələrdə süni intelektdən istifadə olunmağa başlanılıb. Xarici ölkələrdə süni intelektdən kənd təsərrüfatı sahəsində də yararlanırlar. Azərbaycanda bu sahədə vəziyyətin nə yerdə olduğunu müəyyənləşdirmək üçün ekspertə müraciət etdik. 

İqtisadçı ekspert Akif Nəsirli Valyuta.az-a açıqlamasında bildirib ki, Azərbaycanda aqrar sektor primitiv inkişaf mərhələsində olduğundan hələlik süni intelekt üçün münbit şərait yaranmayıb: 

“Süni intelektlə idarə olunan sahələrdə müəyyən mənada mexanikləşdirmələr tətbiq olunur. Çünki onun tətbiqi üçün ilk olaraq sahə mexanikləşdirilməlidir. İdarəetməni süni intelektin özü həyata keçirə bilməz. Süni intelekt hansısa mexanizmlər üzərindən idarəetmə həyata keçirir. Azərbaycanda kənd təsərrüfatının inkişaf mərhələsi primitiv formada olduğundan hələ ki, bu sahədə süni intelektə ehtiyac da duyulmur, onun üçün münbit şərait yoxdur. Ölkəmizdə süni intelektin tətbiqi üçün hər hansı bir məkan yoxdur. Maldarlıqla məşğul olan fermer süni intelekt mexanizmləri olmadığından bütün işləri köhnə qaydada həyata keçirir. Düzdür, müəyyən sahələrdə məsələn, süni suvarma sistemləri yaradılıb. Amma hələ çox azdır”. 

Ekspert qeyd edir ki, süni intelektin tətbiqi insan əməyinin azalmasına və optimallaşmaya gətirib çıxarır:

“Məsələn, süni intelekt proqramı vasitəsilə bitkiyə su vaxtlı-vaxtında verilir. Belə bir mexanizmin tətbiqilə həm işin keyfiyyəti yüksəlir, həm də insan əməyinin səviyyəsi azalır”.

Ramiz