“Avropa qiymətləri Azərbaycan istehsalçısı üçün maraqlıdır”. 

Bu sözləri Valyuta.az-a Liberal İqtisadçılar Birliyinin sədri Akif Nəsirli Azərbaycanda fındıqçılıqla məşğul olan fermerlərin daxili bazara yox, öz məhsullarını xaricə ixrac etməyə üstünlük vermə səbəbləri haqqında danışarkən deyib. 

İqtisadçı deyir ki, fındıq və digər çərəzlər ölkənin yerli bazarlarında nisbətən ucuz qiymətə realizasiya olunur. Amma ixrac etdiyimiz Avropa ölkələrində çərəzin qiyməti yüksəkdir:

“Bu bir tendensiyadır. Kənd təsərrüfatı məhsullarının xaricə çıxarılması müsbət haldır. Amma bununla yanaşı, yerli bazarın təminatı üçün müəyyən məsələlər öz həllini tapmalıdır. Avropa bazarında fındıq ləpəsinin topdansatış qiyməti təxminən 7-8 dollardır. Ona görə də Azərbaycan istehsalçısı üçün xaricə ixrac daha maraqlıdır. Azərbaycandan çiy fındıq ləpəsindən 3.2 faiz, qovrulmuş fındıq ləpəsindən 11.8 faiz gömrük rüsumu alırlar”.  

Akif Nəsirli hesab edir ki, ölkə daxilində istehsal edilən çərəzin Azərbaycanın daxili bazarına yönəldilməsi üçün müəyyən problemlər var:

“Belə ki, bəzi alverçilər, monopolistlər var ki, fındığı, digər çərəzləri əvvəldən istədikləri qiymətə toplayırlar. Hesab edirəm ki, monopoliya və Azərbaycanın daxili bazarlarına istehsalçıların birbaşa daxil olmasındakı maneələr aradan qaldırılmalıdır. Azərbaycan fındığına Avropada 3.2-11.8 faizlik gömrük rüsumu qoyulduğuna görə, daxili bazardakı qiymətlərlə Avropa bazarındakı qiymtələr arasında fərq azalıb. Məsələn, Türkiyə fındığı 0 faizlə ixrac edir, biz isə xam məhsulu 3.2 faiz, qovrulmuş fındığı isə 11.8 faizlə ixrac edirik. Ona görə də bizdə aqrar ixrac bir qədər baha başa gəlir. Bu amil yerli bazarı bir qədər cəlbedici edir. Hesab edirəm ki, maneələr aradan qaldırılsa, daxili bazara yönələn faiz bir qədər artar”.

Davud