“İsrail Zəngilanda, əvvəlcə, 300-400 başlıq camış ferması tikəcək, sonra biz onu 1000 başa çatdırmaq istəyirik”.

Valyuta.az xəbər verir ki, bu sözləri İsrail şirkətinin əməkdaşı Azərbaycan Prezidenti İlham Əliyevin aprelin 26-da Zəngilan rayonunun Ağalı kəndinə səfəri zamanı xarici şirkət nümayəndələri ilə keçirdiyi videoformatda görüşü zamanı səsləndirib. 

Qarabağ ərazilərinin işğaldan azad edilməsi münasibətilə dövlət başçısını təbrik edən israilli əməkdaş Azərbaycanla tərəfdaş olmaqdan şad olduğunu dilıə gətirib.

Mənsub olduğu şirkətin ağıllı fermalar üzrə texnologiya ilə işlədiyini diqqətə çatdıran əməkdaş qeyd edib ki, onlarda bütün fermanı məlumatların təhlili üzrə proqram təminatına birləşdirən ötürücülər var:

“Bu da göründüyü kimi, mal-qaranın yemlənməsi, sağlamlığı və sağılması ilə əlaqədardır. Biz bunu “açar təslimi” layihəsi kimi həyata keçiririk. Buraya texniki-iqtisadi əsaslandırma, tikinti, planlaşdırma, komandanın hazırlanması və mal-qaranın idxalı daxildir. Qeyd etdiyim kimi, heyvanlar sensorlarla təchiz ediləcək. Biz peyin emalı ilə də məşğul oluruq. Peyindən gübrə və bioqaz əldə edə bilirik. Fərqli variantlar var. Tullantı sularının təmizlənməsi, günəş enerjisi. Bu, o deməkdir ki, Sizdə böyük elektrik enerjisi infrastrukturu qurmadan böyük həcmdə elektrik enerjisi istehsal olur. Bu cür ferma çox maraqlı olacaq. Beləliklə, biz İsrailin sahib olduğu süd ferması texnologiyasında bilik və təcrübəmizi Azərbaycana, Qarabağ bölgəsinə gətirmək istəyirik. Bu imkana görə çox sağ olun. Biz sizinlə əməkdaşlıq etməyi səbirsizliklə gözləyirik”.

Şirkət əməkdaşına təşəkkür edən Prezident İlham Əliyev bildirib ki, İsraildə inəklər ən yüksək keyfiyyətli məhsul verir və orada inəkbaşına ən yüksək həcmdə süd alınır.

İsrail şirkətinin əməkdaşı dövlət başçısının sözlərini təsdiq edərək, “İsraildə elə fermalar var ki, orada hər inəkdən 40-45 litr süd alınır. Biz camışlarla da əlimizdən gələni etməyə çalışacağıq” - deyə cavab verib.

Dövlət başçısının, “Bəs hər camışdan orta hesabla nə qədər süd alınır?” – sualını cavablandıran qonaq, camışlarda bunun orta hesabla sağmal inəyin verdiyi məhsulun üçdə biri qədər olduğunu söyləyib. 

“Bu, bir camış başına gündə 8-12 litr arasındadır” - deyə əməkdaş diqqətə çatdırıb.

Prezidentin növbəti “Aydındır. Camışlar İsraildən idxal olunacaq?” – sualını cavablandıran, Azərbaycanın Kənd təsərrüfatı naziri İnam Kərimov camışların İtaliyadan idxal olunacağını bildirib.