Zakir Nuriyev: "Nağdsız əməliyyatların həcmi 34,5 milyard manata yüksəlib"

2026-cı ilin ilk dörd ayında Azərbaycanda ödəniş kartları ilə aparılan əməliyyatların həcmi 49,4 milyard manat təşkil edib.

Valyuta.az xəbər verir ki, bu barədə Azərbaycan Banklar Assosiasiyasının prezidenti Zakir Nuriyev Bakıda keçirilən “Beynəlxalq Maliyyə və Bankçılıq Sammiti 2026”da çıxışı zamanı bildirib.

Onun sözlərinə görə, bu göstərici ötən ilin eyni dövrü ilə müqayisədə təxminən 11% çoxdur.

Zakir Nuriyev bildirib ki, nağdsız ödənişlərin inkişafı bank sektorunda diqqət çəkən əsas istiqamətlərdən biridir. Belə ki, ödəniş kartları ilə aparılan nağdsız əməliyyatların həcmi 29,9 milyard manatdan 34,5 milyard manata yüksəlib.

Nəticədə nağdsız ödənişlərin ümumi kart əməliyyatlarındakı payı 67,1%-dən 69,9%-ə çatıb.

ABA prezidenti həmçinin qeyd edib ki, bank sektorunun kapital göstəriciləri də müsbət dinamika nümayiş etdirir. Bankların məcmu kapitalı illik müqayisədə 9,7% artaraq 7,7 milyard manata çatıb.

Onun sözlərinə görə, bu artım bank sektorunun maliyyə dayanıqlığının və kapital bazasının gücləndiyini göstərir.

Mayya Hüseynova