Texasda "ağ qızıl" tapıldı: Enerji bazarını dəyişə biləcək kəşf

ABŞ-ın Texas ştatında təbii hidrogen yataqları aşkarlanıb. Mütəxəssislərin ilkin qiymətləndirmələrinə görə, səhralıq ərazilərdə 280 min tona yaxın ehtiyat mövcuddur.

Valyuta.az xəbər verir ki, "ağ qızıl" adlandırılan bu resursun əsas xüsusiyyəti aşağı maya dəyəri və minimal karbon tullantıları ilə əldə olunmasıdır. Hidrogenin formalaşması yeraltı suların dəmir tərkibli süxurlarla təbii reaksiyası nəticəsində baş verir.

Layihəni "HyTerra" şirkəti həyata keçirir. "Nemaha" adlı layihə 291 kvadrat kilometr ərazini əhatə edir və artıq ilk qazma işlərində təbii hidrogenlə yanaşı helium nümunələri də aşkarlanıb. Helium yüksək texnoloji avadanlıqların istehsalında mühüm əhəmiyyət kəsb edir.

Şirkətin hesablamalarına görə, bu yataq bərpa olunan enerji sektorunda dönüş yarada bilər. Hidrogenin istifadəsi enerji, nəqliyyat, tikinti və kənd təsərrüfatı kimi sahələrin dekarbonizasiyasına mühüm töhfə verəcək.

Texasda paralel olaraq "Hydrogen City" adlı daha bir nəhəng layihə də həyata keçirilir. Bu layihə hər il günəş və külək enerjisinə əsaslanaraq 280 min ton "yaşıl" hidrogen istehsal etməyi planlaşdırır.

Ekspertlərin fikrincə, bu təşəbbüslər ABŞ-ın karbon emissiyalarını azaltmaqla yanaşı, ölkəni bərpa olunan enerji sahəsində dünya liderlərindən birinə çevirə bilər.

Paşa Məmmədli