Tarixdə 600 milyard dollarlıq ən böyük müflisləşmə 

Müflisləşmə iqtisadi tarixdə şirkətlərin, bankların, hətta dövlətlərin belə maliyyə çətinlikləri səbəbindən borclarını ödəyə bilmədiyi vəziyyəti ifadə edir. Bəzən bir müflisləşmə hadisəsi təkcə bir ölkəni deyil, bütün dünyanı sarsıda bilir. Tarixin ən böyük müflisləşmə hadisəsi isə 2008-ci ildə ABŞ-da baş verib.

Valyuta.az xəbər verir ki, dünyanın ən nüfuzlu investisiya banklarından biri kimi tanınan Lehman Brothers 2008-ci ildə rəsmi olaraq 600 milyard dollardan çox borcla müflis olduğunu elan edib. Bu, ABŞ və dünya tarixində qeydə alınmış ən böyük müflisləşmə hadisəsi idi.

1850-ci ildə təsis edilən Lehman Brothers 150 ildən artıq fəaliyyət göstərmiş, investisiya bankçılığı, daşınmaz əmlak bazarı, risk idarəetməsi və maliyyə məsləhətçiliyi sahələrində dünyada nüfuz qazanmışdı. Xüsusilə 2000-ci illərin əvvəllərində bank daşınmaz əmlak və ipoteka kreditləri bazarında böyük aktivlərə sahib idi.

Müflisləşmənin səbəbi:

1. ABŞ-da ipoteka böhranı 

2. Riskli sərmayələr və daşınmaz əmlak bazarında şişən balon

3. Mühasibat şəffaflığının olmaması

4. Dövlətin xilasetmə addımlarının atılmaması

Nəticələr:

Lehman Brothers-in batışı qlobal maliyyə bazarlarında “zəlzələ” effekti yaratdı: fond bazarları çökməyə başladı, banklararası kreditləşmə dayandı və panika yayıldı. Nəticədə, 2008–2009-cu illərdə dünyanı əhatə edən maliyyə böhranı başladı. ABŞ-da milyonlarla insan işini və evini itirdi, qlobal iqtisadiyyat isə böyük itkilərə məruz qaldı.

Tənzilə Ağabalayeva