"Samsung"un brend dəyəri 89,4 milyard dollara yüksəlib

Cənubi Koreyanın ən iri 150 brendinin ümumi dəyəri 2025-ci ildə 342,2 milyard ABŞ dollarına çatıb. Bu, ötən illə müqayisədə 7%-lik artım deməkdir. 

Valyuta.az xəbər verir ki, elektronika, avtomobil və bank sektoru ümumi dəyərin yarıdan çoxunu təşkil edərək böyümənin əsas hərəkətverici qüvvəsi olub.

"Samsung" yenidən zirvədə

"Samsung" doqquzuncu il ardıcıl olaraq ölkənin ən dəyərli brendi statusunu qoruyub. Onun dəyəri 9% artaraq 89,4 milyard ABŞ dollarına yüksəlib. Şirkətin qlobal mövqeyi, innovasiya fəaliyyəti və ölkə iqtisadiyyatındakı simvolik rolu bu nəticəni möhkəmləndirir.

2024-cü ildə smartfon və yarımkeçirici satışlarının bərpası, süni intellekt və çip istehsalına yatırımlar, bərpa olunan enerji ilə işləyən zavodlar və dairəvi iqtisadi təşəbbüslər şirkətin brend dəyərinə müsbət təsir göstərib.

İlk üçlükdə "Hyundai" və "SK hynix"

"Hyundai"nin brend dəyəri 15% artaraq 26,4 milyard ABŞ dollarına çatıb. Güclü maliyyə göstəriciləri, elektromobil satışlarının artması və valyuta məzənnələrinin əlverişli təsiri bu nəticəni şərtləndirib. Şirkət 24,3 trilyon von həcmində daxili sərmayə ilə elektromobil istehsalını və mobillik texnologiyalarını inkişaf etdirməyi planlaşdırır.

"SK hynix" isə siyahıda ən yüksək artımı nümayiş etdirib. Şirkətin brend dəyəri 37% artaraq 13,7 milyard ABŞ dollarına çatıb. Gəlirlərin 102% yüksəlməsi və əməliyyat mənfəətinin 41% artması, süni intellekt üçün yaddaş çiplərinə tələbin kəskin böyüməsi ilə əlaqələndirilir.

Ən güclü brend: "Samsung Heavy Industries"

"Samsung Heavy Industries" brend dəyərini 32% artıraraq 577 milyon ABŞ dollarına çatdırıb və 93,4/100 göstərici ilə ölkənin ən güclü brendi seçilib. Şirkətin uğurları arasında gəmiqayırma müqavilələri, karbon tutma layihələri və külək enerjisi proqramları xüsusi qeyd olunur.

İkinci və üçüncü ən güclü brendlər müvafiq olaraq "Samsung C&T" (6 milyard ABŞ dolları) və "Samsung Securities" (618 milyon ABŞ dolları) olub. Hər iki şirkət AAA+ reytinqinə layiq görülüb.

2025-ci ilin ən sürətli yüksəlişi: "GS EPS"

Brend dəyəri 104% artaraq 340 milyon ABŞ dollarına çatan "GS EPS" ilin ən sürətlə böyüyən brendi olub. Enerji bazarındakı tələbatın artması, idarəetmədə yeniliklər və uzunmüddətli inkişaf perspektivləri şirkətin uğurunu şərtləndirib.

"Brand Finance"in Asiya-Sakit okean üzrə direktoru Alex Haigh bildirib ki, "Samsung" və "Hyundai" süni intellekt, çip istehsalı və davamlı mobillik sahəsindəki yatırımları ilə qlobal bazarda mövqelərini möhkəmləndirir. "GS EPS" kimi şirkətlərin yüksəlişi isə enerji və infrastrukturun gələcəkdə daha mühüm rol oynayacağını göstərir. Siyasi qeyri-müəyyənliyə baxmayaraq, 7%-lik artım Koreya brend ekosisteminin gücünü və innovasiya potensialını nümayiş etdirir".

Bundan əlavə, "Samsung" ölkənin ən dəyərli brendi olmaqla yanaşı, 7,9 milyard ABŞ dolları ilə Cənubi Koreyada ən yüksək "sustainability perception value" göstəricisinə sahib olub.

Mayya Hüseynova