Qızılın qiyməti yüksəlməyə davam edir

Qızıl, ABŞ Federal Ehtiyat Sisteminin (FED) bu il iki mümkün faiz endirimi edəcəyi gözləntisinin davam etməsi fonunda yeni zirvəyə yüksəlib. 

Valyuta.Az xəbər verir ki, davam edən geosiyasi və iqtisadi gərginliklər təhlükəsiz investisiya vasitələrinə olan tələbi artırdığı üçün qızılın 1 troy unsiyası (təxminən 31,1 qram) 3056,19 dollara çatıb.  

Hazırda spot bazarda qızılın qiyməti dünənlə müqayisədə 0,14% artaraq 3051,78 dollar/ons səviyyəsində ticarət olunur.  

Qızılın qiyməti bu həftə 2,26%, ayın əvvəlindən bəri 6,91%, ilin əvvəlindən isə 16,3% yüksəlib.  

"Heraeus Metals Hong Kong Ltd." şirkətinin baş direktoru Dik Pun, qızılın "bazardakı bir çox qeyri-müəyyənlik, geosiyasi gərginliklər, zəifləyən ABŞ dolları və gələcəkdə faiz dərəcələrinin endiriləcəyi gözləntiləri" ilə dəstəkləndiyini bildirib.  

"OCBC" bankının valyuta strategiyaçısı Kristofer Vonq isə qeyd edib ki, "hazırda qızılın təhlükəsiz investisiya vasitəsi və inflyasiyadan qorunma aləti kimi cəlbediciliyi geosiyasi narahatlıqlar və tariflərlə bağlı qeyri-müəyyənlik fonunda daha da güclənir. Qızılın perspektivi ilə bağlı müsbət fikirdəyik."  

"ABC Refinery" şirkətinin korporativ bazarlar üzrə qlobal rəhbəri Nikolas Frappell isə bildirib ki, "qızılın birinci rübdəki güclü performansını nəzərə alsaq, ciddi bir düzəliş ehtimalı görmürəm. Bununla belə, indiyə qədər baş verən düzəlişlər nisbətən qısa müddətli olub və bazar tərəfindən yaxşı qarşılanıb. 3090-3100 dollar aralığında müqavimət səviyyəsi müşahidə oluna bilər."

Rəhim