"Opel" Almaniyaya 1 milyard avrodan çox investisiya qoyacaq

“Opel” 2030-cu ilə qədər Almaniyaya 1 milyard avrodan çox investisiya yatıracağını açıqlayıb. 

Valyuta.az xəbər verir ki, şirkət bu planı “Stellantis” İnvestor Günü çərçivəsində təqdim edib. Bu dövrdə iki model daxil olmaqla ümumilikdə dörd yeni avtomobil bazara çıxarılacaq. Modellərdən ikisi yeni “STLA One” platforması üzərində hazırlanacaq.

Yeni xəttə yeni nəsil “Astra” və “Corsa”, həmçinin “Leapmotor” ilə əməkdaşlıq çərçivəsində hazırlanacaq yeni C-SUV modeli daxildir.

Yeni nəsil “Astra” və “Corsa” tamamilə yenilənir

Yeni nəsil “Astra” “STLA One” platforması üzərində istehsal ediləcək və Rüsselsheim zavodunda yığılacaq. “Corsa” modeli də eyni arxitekturadan istifadə edəcək. “Opel” bu yeniliklə elektrikli avtomobilləri daha əlçatan etməyi hədəfləyir.

Hər iki model 2030-cu ildən əvvəl bazara çıxacaq. “Stellantis” “STLA One” platformasını 2027-ci ildə istifadəyə verməyi planlaşdırır. Bu modul sistem müxtəlif avtomobil ölçülərinə və mühərrik növlərinə uyğunlaşdırıla bilir.

Platformanın əsas məqsədi xərcləri təxminən 20% azaltmaq, istehsalı sadələşdirmək və inkişaf prosesini sürətləndirməkdir. Bu texnologiyanın qlobal miqyasda 30-dan çox modeldə istifadə olunacağı gözlənilir. Bundan əlavə, daha ucuz litium-dəmir-fosfat batareyalarını dəstəkləyəcək. 800 voltluq sistem isə sürətli şarj imkanları yaradacaq.

Yeni C-SUV modeli 2028-ci ildə təqdim olunacaq

Yeni C-SUV 2028-ci ildə İspaniyanın Saragosa şəhərində istehsal ediləcək. Model Çin şirkəti “Leapmotor”un platforması və batareya texnologiyası əsasında hazırlanır. Bununla belə, “Opel” avtomobilin dizaynını və sürüş dinamikasını öz brend kimliyinə uyğun formalaşdıracaq.

Bu model əsasən “Leapmotor B10” platformasına əsaslanır. B10 215 at gücünə malik elektrik mühərriki ilə təchiz edilir. İki fərqli batareya seçimi ilə 434 kilometrə qədər yürüş məsafəsi təqdim edir.

Eyni modeldə uzadılmış məsafə sistemi də mövcuddur. Bu sistemdə 1.5 litrlik benzin mühərriki, kiçik batareya və elektrik motoru birlikdə işləyir. Avtomobil yalnız elektriklə 86 kilometr, hibrid rejimdə isə ümumilikdə 900 kilometr məsafə qət edə bilir.

Bu plan “Opel”in elektrikləşmə strategiyasını gücləndirməklə yanaşı, Avropada istehsal və texnologiya rəqabətini də artırmağı hədəfləyir.

Paşa Məmmədli