Onlar pulu beş barmaqla sayır, bəs siz necə sayırsız?

Pul sadəcə alış-veriş vasitəsi deyil, həm də insanın dünyagörüşünü və maliyyəyə münasibətini açıq göstərən bir simvoldur. Kimisi cibindəki kağız pulu barmaqları ilə sürətlə çevirərək sayır, kimisi isə hər banknotu diqqətlə yoxlayır. Amma milyarderlərin dünyasında pul tamamilə başqa cür “sayılır”.

Pul saymağın mədəniyyətləri

Dünyanın bir çox yerində pulu sayma vərdişi fərqlidir.

Yaxın Şərq və postsovet məkanında insanlar pulu sürətlə beş barmaqla çevirərək sayırlar - bu həm praktik, həm də güc nümayişidir.

Asiya ölkələrində pul daha səliqəli və nəzakətli şəkildə sayılır, çünki pulun təqdimatı qarşı tərəfə hörmət əlaməti sayılır.

Qərbdə isə çox vaxt insanlar kağız pulu səliqə ilə bir-bir çevirir, çünki sürətli “barmaq oyunu” qeyri-rəsmi qəbul olunur.

Bu sadə hərəkət - pulun necə sayıldığı - insanın psixologiyasını da göstərir. Kimisi sürətlə və emosiyasız davranır, kimisi diqqətli və ehtiyatlı, yeni nəsil isə ümumiyyətlə kağız pulu görmür, ödənişləri telefonla həyata keçirir.

Milyarderlərin pulu “sayma” fəlsəfəsi

Adi insanlar pulu barmaqla hiss etmədən onun dəyərinə inanmır. Amma milyarderlərin dünyasında “pul saymaq” artıq rəqəmlərlə, balanslarla və investisiya portfelləri ilə bağlıdır.

Jeff Bezos üçün pul nəticədir, məqsəd isə gəlir gətirən sistemlər qurmaqdır. O, pulu barmaqla deyil, Amazon-un qlobal satış rəqəmləri ilə “sayır”.

Warren Buffett isə sərvətinə baxmayaraq hələ də qənaətcildir. O, səhərlər “McDonald’s”dan sadə menyu alır və qəpiyin hesabını aparır. Onun üçün pulun dəyəri həmişə konkret sayma ilə bağlıdır.

Elon Musk isə sərvətini Mars və texnologiyalara yatıraraq risklərlə “sayır”. O, pulun kağız formasını deyil, gətirəcəyi gələcək nəticələri hesablayır.

Pulun yeni siması

Kağız pullar əlimizdən çıxsa da, pulu necə “saymağımız” dəyişmir, sadəcə forması fərqlənir. Biri kağızı beş barmaqla çevirir, digəri bankdakı rəqəmlərə baxır, milyarderlər isə sərvətini şirkətlərin dəyəri, investisiya portfelləri və texnoloji inqilablarla ölçür.

Mayya Hüseynova