Kibertəhlükəsizlik şirkəti 35 milyon dollar investisiya alıb

Süni intellekt dəstəkli kibertəhlükəsizlik sahəsində fəaliyyət göstərən "Sola Security" 35 milyon dollar investisiya cəlb edib.

Valyuta.az xəbər verir ki, bununlada 2023-cü ildə təsis olunan şirkətin ümumi investisiya həcmi 65 milyon dollara çatıb.

"Sola Security" yeni maliyyə dəstəyindən məhsul inkişafı, elmi-tədqiqat və beynəlxalq miqyasda böyüməni sürətləndirmək üçün istifadə edəcəyini bildirib.

Guy Flechter və Aner Cohen tərəfindən qurulan "Sola Security" əsasən süni intellekt dəstəkli kibertəhlükəsizlik platforması təqdim edir. Bu platforma şirkətlərə öz təhdid aşkarlama tətbiqlərini sürətli və elastik şəkildə inkişaf etdirmək imkanı verir. İstifadəçilərdən tələb olunan yeganə şey, hansı sistemlərin izlənəcəyini və hansı tip təhlükəsizlik boşluqlarının nəzarətə alınacağını müəyyənləşdirməkdir.

Sistem izlənilən infrastrukturdan təhlükəsizlik məlumatlarını toplayaraq analiz edir, avtomatik olaraq SQL sorğuları yaradır və potensial riskləri müəyyənləşdirir. Şifrlənməmiş "Amazon S3" yaddaş sahələrini və ya həddindən artıq səlahiyyət verilmiş istifadəçi hesablarını aşkarlaya bilir. Bundan əlavə, platforma tapıntıları qrafiklər vasitəsilə vizuallaşdırır, yeni təhlükəsizlik boşluqlarını mütəmadi şəkildə skan edir və aşkarlananda xəbərdarlıq verir. Daxili çatbot sayəsində istifadəçilər məlumatları təbii dildə verilən suallarla araşdıra bilirlər. Bundan başqa, "graph research" funksiyası bir sistemdəki boşluğun digər infrastruktur vahidlərinə yayılma riskini təhlil etməyə imkan verir.

Mayya Hüseynova