"Kibertəhdidlər real vaxtda baş verir, cavab da real vaxtda olmalıdır"

Müasir kibertəhlükəsizlik yanaşmaları artıq statik məlumatların təhlilinə deyil, real vaxt rejimində baş verən təhdidlərə operativ cavab verməyə əsaslanır.

Valyuta.az xəbər verir ki, bunu Bakıda keçirilən “Beynəlxalq Maliyyə və Bankçılıq Sammiti 2026”da çıxışı zamanı “Azercell Telecom” MMC-nin Daxili Audit Departamentinin direktoru Ziya İbrahimov bildirib:

"Aparıcı ödəniş sistemlərindən birinin məlumatına görə, hər dəqiqə təxminən 200 unikal kiberhücum qeydə alınır".

Onun sözlərinə görə, banklar, fintexlər və digər rəqəmsal xidmətlərin yaratdığı geniş ekosistem hücum səthini artırır və təşkilatları daha böyük risklərlə üz-üzə qoyur.

Z.İbrahimov qeyd edib ki, kibercinayətkarlıq artıq ayrıca biznes modelinə çevrilib. Bu sahədə fəaliyyət göstərən qruplar maliyyə resurslarına, komandaya və peşəkar alətlərə malikdirlər ki, bu da təhdidlərin miqyasını daha da böyüdür.

O vurğulayıb ki, təşkilatlar bütün hücumların qarşısını ala bilməsələr də, dayanıqlı sistemlər qurmaqla risklərin təsirini minimuma endirə bilərlər. Bunun üçün böhran ssenarilərinin mütəmadi sınaqdan keçirilməsi, rəhbərlik səviyyəsində koordinasiyanın gücləndirilməsi və insan amilinə investisiyanın artırılması vacibdir.

Rəfiqə Abdin