Kart oğurluğunda kim günahkardır: bank, yoxsa müştəri?

Bank kartlarından oğurluq halları tez-tez baş verir. Bu zaman müştəri bəzən külli miqdarda pulunu itirir. Müştəri bu zaman bankı günahlandırır və pulunu geri tələb edir. Bank isə bildirir ki, səbəb müştəridir, kart məlumatlarını üçüncü şəxslərə təqdim etdiyi üçün bu problem yaşanır. Həqiqətən, həmişə problem müştəriyə bağlı olur?

Bank eksperti Əkrəm Həsənov Valyuta.az-a açıqlamasında qeyd edir ki, əksər zaman kart oğurluğu ilə bağlı hallarda günah birbaşa müştərinin özündə olur: “Çünki müştəri kart məlumatlarını kiməsə ötürür. Bu, əsasən iki formada baş verir: Birinci forma odur ki, müştərinin telefonuna zəng edərək özünü bank əməkdaşı kimi təqdim edən dələduz onun kart məlumatlarını öyrənir. Halbuki, son illərdə banklar tərəfindən dəfələrlə bildirilib  ki, bank əməkdaşları telefonda heç vaxt kart məlumatlarını soruşmur. Müştərilərə də heç kəsə bu məlumatları təqdim etməmələri mövzusunda xəbərdarlıq edilir. İkinci formada idə, müştəri tanınmamış internet saytında alış-veriş edir və bütün kart məlumatlarını saytda paylaşır. Nəticədə məlumatları oğurlanır”.

Ekspert qeyd edir ki, bəzi hallarda günah bankın özündə də ola bilər: “Əgər bank işçiləri məlumatları ötürürsə və ya hakerlər bankın təhlükəsizlik sistemini sındıraraq daxil olursa, bu halda məsuliyyət bankın üzərinə düşür. Müştəri bu vəziyyətdə məhkəməyə müraciət edə bilər. Lakin bu, kifayət qədər çətin prosesdir”.

“Bu səbəbdən müştərilərə tövsiyə olunur ki, kartda çox böyük məbləğdə pul saxlamasınlar və pullarını bir kartda deyil, müxtəlif bank kartlarında bölüşdürsünlər. Beləliklə, hər hansı bir kartda problem yarandıqda böyük məbləğdə itki yaşanmaz” - deyə ekspert Ə.Həsənov deyir.

Tənzilə Ağabalayeva