İşə qəbulda tanışlıq faktoru artıq keçmişdə qalır

Tez-tez iş tapmaqda çətinlik çəkənlər bildirirlər ki, işə qəbul olunmamaqlarının əsas səbəblərindən biri də tanışlıq faktorunun onlardan daha ön plana çıxmasıdır. Yəni iş yerlərində əlaqələri olan şəxslərin daha çox üstünlük qazanması, işə qəbul prosesinə təsir göstərir. Bəs bu həqiqətən belədirmi?

HR İlkin Mirzəzadə Valyuta.az bildirir ki bu heç də belə deyil: “Karyera yüksəlişində tanışlıq faktoruna artıq çox az hallarda rast gəlinir. Buna səbəb, iş yerlərində performans, bacarıq və işə sərf edilən əməyə daha çox önəm verilməsidir. Çünki tanışlıq vasitəsilə yalnız müəyyən bir yerə qədər irəliləmək mümkündür. Bir müddətdən sonra işçinin işə heç bir faydasının olmadığı müəyyən edilir. Nəinki işə xeyir vermək, bəzən ziyan da verilir ki, bu da həm işçiyə, həm də rəhbərliyə zərər gətirir.

Tanışlıqla karyera yüksəlişi bəlkə 15 il əvvəl daha rahat idi. İndiki dövrdə isə tanışlıqla hər hansı bir işdə mövqe tutmaq çətindir. Hətta dövlət və özəl qurumlar belə performansı yaxşı olan, şirkətə qatqısı olan, çevik, bacarıqlı və s. kimi üstünlükləri olan işçiləri seçməyə üstünlük verirlər.

Əgər işçi həqiqətən yaxşı performans göstərirsə, tapşırıqları yerinə yetirirsə, öz kreativliyini ortaya qoyursa və fikirlərini bölüşürsə, bu onun yüksəliş qərarına birbaşa təsir edir”.

Tənzilə Ağabalayeva