İşçilərin məsuliyyətini necə gücləndirmək olar? - Bir neçə sadə addım - SƏHƏR OXUSU

Bəzən rəhbərlər işçilərin məsuliyyətdən yayınmalarına göz yumurlar. Bunun səbəbi adətən qarşıdurmadan qaçmaq istəyidir. Amma məsuliyyət hissinin olmaması həm rəhbər, həm də komanda üçün mənfi nəticələr yaradır.

Məsələn, zəif nəticə göstərən bir satış işçisi özünü komandadakı tək uğursuz insan kimi hiss edə bilər. Əgər ona dəstək verilməzsə, yol göstərilməzsə, bu işçi özünü kənarda qalmış kimi hiss edəcək, motivasiyası düşəcək və hətta işdən çıxmağı düşünə bilər.

Həmçinin, məsuliyyət hissi olmadıqda, digərləri də bunu normal saymağa başlayır. Bu zaman komanda üzvləri zəif performans göstərən əməkdaşın yaratdığı boşluğu doldurmaq üçün daha çox işləmək məcburiyyətində qalır və bu, narazılıq yaradır.
Bəzən də problemin kimdən qaynaqlandığını müəyyən etmək olmur. Belə olanda əməkdaşlar rəhbərliyi ədalətsizlikdə və ya zəiflikdə günahlandıra bilər.

Amma bu vəziyyəti düzəltmək mümkündür. 

Valyuta.az situasiyanı öz xeyrinizə dəyişmək, işçilərin məsuliyyətini artırmaq üçün sizə ata biləcəyiniz bir neçə addımı təqdim edir. 

Çətin söhbətdən çəkinməyin

İşçinin məsuliyyət daşımasını təmin etmək üçün onunla danışmaq lazımdır. Burada əsas məqsəd şəxsi deyil, performansı müzakirə etməkdir.

Məsələn, söhbətə belə başlaya bilərsiniz:

“Bu vəziyyətin baş verdiyini gördüm. Səncə burada nə səhv getdi?”

“Bu prosesi birlikdə nəzərdən keçirə bilərikmi?”

“Növbəti görüşdə mənim də iştirak etməyim sənə kömək edərmi?”

Bu söhbətlər zamanı problemi anlamağa çalışın. Zəif performansın səbəbi çox vaxt bunlardan biri olur:

• rəhbərin göstərişlərinin aydın olmaması,
• işçiyə əlavə təlim lazım olması,
• texniki problem,
• şəxsi problemlər,
• qarışıq və bir-birinə zidd prioritetlər.

Problemi tez həll edin

Məsələni uzatmayın. Çünki vaxtında həll edilməyən problem daha da böyüyə bilər. Əsas məqsəd zəif performansın səbəbini tapmaq və uyğun həll tapmaqdır.

Məsələn, yeni işçi təlimə ehtiyac duya bilər, təcrübəli işçi isə həddən artıq iş yükü altında qalır. Kiminsə performansı bir az rəhbər dəstəyi ilə yüksələ bilər. Ona görə də gözləntilərinizi aydın şəkildə izah edin və yazılı hədəflər qoyun ki, işçi nə etməli olduğunu dəqiq bilsin.

İşçinin vəziyyətini nəzərə alın

İşçinin davranışını dərhal “tənbəllik” kimi qiymətləndirməyin. Bəlkə də səbəb başqadır.
Məsələn, bir işçi hər gün yarım saat gec gəlirsə, onunla danışın. Ola bilər ki, övladını məktəbə aparmalı olduğu üçün gecikir. Bu halda ya o öz cədvəlini dəyişməlidir, ya da siz ona xüsusi iş qrafiki təklif edə bilərsiniz.

Burada əsas odur ki, həm şirkətin, həm də işçinin ehtiyaclarını nəzərə alasınız.

Aydın və ölçülə bilən hədəflər qoyun

İşçilər nədən məsul olduqlarını bilməlidirlər. Ona görə hədəflər konkret, ölçülə bilən, əldə edilə bilən, real və vaxt məhdudiyyətli olmalıdır.

Nəticələri izləyin

Danışıqdan sonra nələr razılaşdırıldığını qısa şəkildə yazıb həm özünüzə, həm də işçiyə göndərin. Bu, prosesi şəffaf və izlənə bilən edəcək.
Daha sonra işçinin performansını müşahidə edin. Kiçik də olsa yaxşı iş gördüyünü görsəniz, onu təbrik edin. Pozitiv yanaşma ən güclü motivasiya üsullarından biridir.

Bu addımlar həm rəhbərə, həm də işçiyə vəziyyəti aydın görməyə kömək edir. Nəticədə məsuliyyət hissi artır, komanda daha balanslı işləyir və motivasiya yüksəlir.

Günay