“iPhone 17” təqdimatından sonra “Apple” səhmləri ucuzlaşdı

“Apple Inc.”nin “AAPL” səhmləri 9 sentyabr 2025-ci ildə keçirilən “iPhone 17” təqdimatından sonra 1,5% ucuzlaşıb.

Valyuta.az xəbər verir ki, tədbirdə “Apple Watch” və “AirPods” üçün real vaxt tərcümə funksiyası kimi yeniliklər təqdim edilsə də, analitiklərin fikrincə, əsas məhsul olan “iPhone”da radikal dəyişikliklərin olmaması investor gözləntilərini doğrultmadı.

Şirkətin süni intellektdə böyük rəqiblərindən geri qalması ilə bağlı narahatlıqlar da səhm təzyiqini gücləndirir. “Siri”nin süni intellektlə gücləndirilmiş versiyasının yalnız 2026-cı ilin yazında istifadəyə veriləcəyi gözlənilir. Bu arada bir neçə aparıcı tədqiqatçının “Meta Platforms Inc.” və digər şirkətlərə keçməsi, “Apple”ın innovasiya potensialını sual altına qoyub.

Bununla belə, analitiklər bildirirlər ki, “Apple” hələ də bazarda güclü mövqeyə sahibdir. Orta hədəf qiymət 238,96 dollar müəyyən edilib ki, bu da son bağlanış qiymətindən bir qədər yuxarıdır. Ekspertlərin fikrincə, yaxın perspektivdə “Apple” səhmlərində ciddi artım yalnız süni intellekt sahəsində irəliləyişlərdən sonra mümkün ola bilər.

Mayya Hüseynova