"Instagram" paylaşımların yerini dəyişməyə icazə verdi

"Instagram" istifadəçilərin uzun müddətdir gözlədiyi yeniliyi təqdim edib. Artıq istifadəçilər profil səhifələrindəki paylaşımların yerini dəyişərək onları istədikləri ardıcıllıqla göstərə biləcəklər.

Valyuta.az xəbər verir ki, yeni funksiya sayəsində paylaşımlar yalnız paylaşım tarixinə görə sıralanmayacaq. İstifadəçilər əvvəl paylaşdıqları fotoları və videoları profil daxilində fərqli mövqelərə daşıya biləcəklər.

"Instagram" rəhbəri Adam Mosseri bildirib ki, bu funksiya üzərində təxminən bir il əvvəl işlənməyə başlanılıb. Şirkət artıq yeniliyin bütün dünyada istifadəçilərə təqdim edildiyini açıqlayıb.

Yeni xüsusiyyətdən istifadə etmək üçün istifadəçilər istənilən paylaşımın üzərinə uzun basaraq "Şəbəkəni yenidən düzənlə" seçiminə daxil ola və paylaşımları sürüşdürərək yeni sıra yarada bilərlər.

Bu yenilik xüsusilə profillərini müəyyən vizual konsept və ya dizayn əsasında quran məzmun yaradıcıları üçün daha geniş fərdiləşdirmə imkanları təqdim edir. Profilin yuxarısına sabitlənmiş paylaşımlar əvvəlki kimi yerində qalacaq, digər paylaşımların mövqeyi isə istifadəçinin seçiminə uyğun dəyişdirilə biləcək.

Sərvanə Rəmixanova